തിരുവനന്തപുരം: അറബിക്കടലില് ന്യൂനമര്ദ്ദം ഇന്നും നാളെയും ശക്തിപ്രാപിക്കും. ഈ സാഹചര്യത്തില് മഴ ശക്തമാകുമെന്നാണ് കാലാവസ്ഥാ നിരീക്ഷണ കേന്ദ്രം പറയുന്നത്. കാറ്റ് 70 കിമീ വേഗത പ്രാപിച്ചാല് ലുബാന് ചുഴലിക്കാറ്റിന്റെ ഔദ്യോഗിക പ്രഖ്യാപനം വരും.
അഡീഷണല് ചീഫ് സെക്രട്ടറി പി.എച്ച്.കുര്യന്റെ നേതൃത്വത്തില് സെക്രട്ടേറിയറ്റില് 24 മണിക്കൂറും പ്രവര്ത്തിക്കുന്ന സെല് പ്രവര്ത്തനം തുടരുന്നുണ്ട്. കെഎസ്ഇബി 13 അണക്കെട്ടുകളുടെ ഷട്ടറുകള് തുറന്നിട്ടുണ്ട്. ഇന്നത്തെ കാലാവസ്ഥ റിപ്പോര്ട്ടുകള് പരിഗണിച്ചായിരിക്കും ഷട്ടര് താഴ്ത്തുന്ന കാര്യത്തില് തീരുമാനമെടുക്കുക. ന്യൂനമര്ദ്ദം ശക്തി പ്രാപിച്ച് ഒമാന് തീരത്തേക്കാണ് നീങ്ങുന്നത്.
കേരളത്തിലെ ഇടുക്കി, പത്തനംതിട്ട, മലപ്പുറം, പാലക്കാട്, വയനാട് ജില്ലകളില് ശക്തമായ മഴ പെയ്യുമെന്നാണ് പറയുന്നത്. ഈ ജില്ലകളില് ഓറഞ്ച് അലര്ട്ടും മറ്റ് ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്. ഞായറാഴ്ച ഉച്ചയ്ക്ക് കേന്ദ്ര കാലാവസ്ഥാ നിരീക്ഷണകേന്ദ്രം പുറപ്പെടുവിച്ച അറിയിപ്പ് പ്രകാരം ന്യൂനമര്ദ്ദം കൂടുതല് കരുത്ത് നേടി തീവ്രന്യൂനമര്ദ്ദമായി മാറിയിട്ടുണ്ട്. ലക്ഷദ്വീപിലെ മിനിക്കോയ് ദ്വീപിന് 960 കി.മീ വടക്ക് പടിഞ്ഞാറും, ഒമാനിലെ സലാലയ്ക്ക് 1336 കി.മീ കിഴക്കുമായാണ് ന്യൂനമര്ദ്ദം ഇപ്പോള് ഉള്ളത്.