പനാജി: പെണ്‍കുട്ടികളും ബിയര്‍ കുടിക്കാന്‍ തുടങ്ങിയിരിക്കുന്നത് പേടിപ്പെടുത്തുന്നുവെന്ന് ഗോവ മുഖ്യമന്ത്രി മനോഹര്‍ പരീക്കര്‍. ഇപ്പോള്‍ പെണ്‍കുട്ടികളും ബിയര്‍ കുടിക്കാന്‍ തുടങ്ങിയിരിക്കുന്നു. ഇത് സഹിഷ്ണുതയുടെ പരിധി കടന്നിരിക്കുന്നുവെന്നും പരീക്കര്‍ വ്യക്തമാക്കി.
മയക്കുമരുന്ന് ശൃംഖലയ്ക്കെതിരെ സര്‍ക്കാര്‍ പോരാട്ടം തുടരുകയാണെന്നും അത് കുടുതല്‍ ശക്തമാക്കുമെന്നും പരീക്കര്‍ കൂട്ടിച്ചേര്‍ത്തു.എന്നാല്‍ ലഹരിമരുന്ന് പൂര്‍ണമായി ഇല്ലാതാക്കാന്‍ കഴിയുമെന്ന വിശ്വാസം തനിക്കില്ലെന്നും കോളജുകളില്‍ ഇത് കൂടതല്‍ ഉപയോഗിക്കപ്പെടുന്നുണ്ടെന്നു താന്‍ കരുതുന്നില്ലെന്നും പരീക്കര്‍ വ്യക്തമാക്കി.
നേരത്തെ സംസ്ഥാനത്തെ മയക്കുമരുന്ന് കടത്തിനെതിരെ ശക്തമായ നടപടികള്‍ പരീക്കര്‍ സ്വീകരിച്ചിരുന്നു. സംസ്ഥാനത്തെ മയക്കുമരുന്ന് ശൃംഖല ഒരു പരിധി വരെ അടിച്ചമര്‍ത്താന്‍ സാധിച്ചുവെന്നും അദേഹം വ്യക്തമാക്കിയിരുന്നു .
തീരദേശ സംസ്ഥാനമായ ഗോവ രാജ്യത്തെ ടൂറിസ്റ്റ് ഡെസ്റ്റിനേഷനുകളില്‍ ഒന്നായി വളര്‍ന്നുകൊണ്ടിരിക്കുകയാണ്. ബീച്ചുകളും, നൈറ്റ് പാര്‍ട്ടികളും സജീവമായ ഗോവയില്‍ മദ്യത്തിന് പല നിയന്ത്രണങ്ങളും പരീക്കര്‍ നടപ്പാക്കിയിരുന്നു. അതിനു പിന്നാലെയാണ് പെണ്‍കുട്ടികളുടെ കാര്യത്തില്‍ പരീക്കര്‍ ആശങ്ക പ്രകടിപ്പിച്ചത്.
