കോട്ടയം: കെവിന് വധക്കേസിലെ പ്രതികളായ പൊലീസുകാരുടെ ജാമ്യം റദ്ദാക്കാന് സര്ക്കാര് കോടതിയിലേക്ക്. ഇത് സംബന്ധിച്ച് അന്വേഷണസംഘം ഹൈകോടതിയില് നാളെ ഹരജി നല്കും. മുഖ്യപ്രതി ഷാനുവില് നിന്നും കൈക്കൂലി വാങ്ങിയ കേസിലാണ് ഗാന്ധിനഗര് സ്റ്റേഷനിലെ എ.എസ്.ഐയും ഡ്രൈവറും അറസ്റ്റിലായത്. ഏറ്റുമാനൂര് കോടതിയാണ് ഇവര്ക്ക് ജാമ്യം അനുവദിച്ചത്. ഇത് അന്വേഷണ സംഘത്തിന് വന്തിരിച്ചടിയായിരുന്നു.
കേസില് വീഴ്ച വരുത്തിയ ഗാന്ധിനഗര് സ്റ്റേഷനിലെ നാല് പൊലീസുകാര്ക്ക് ഇന്ന് നോട്ടീസ് നല്കും. അച്ചടക്ക നടപടിയില് തീരുമാനമെടുക്കുന്നതിന് മുമ്പായാണ് വിശദീകരണം ആവശ്യപ്പെടുന്നത്. 15 ദിവസത്തിനകം മറുപടി നല്കണമെന്നാവശ്യപ്പെട്ടാണ് അന്വേഷണസംഘം നോട്ടീസ് നല്കുന്നത്.
ഗാന്ധിനഗര് എസ്.ഐ എം.എസ്. ഷിബുവടക്കമുള്ള പൊലീസുകാര് ഗുരുതരകൃത്യവിലോപം നടത്തിയതായി പ്രത്യേക അന്വേഷണ സംഘത്തലവനും കൊച്ചി റേഞ്ച് ഐ .ജിയുമായ വിജയ് സാഖറെ സംസ്ഥാന പൊലീസ് മേധാവിക്ക് നല്കിയ റിപ്പോര്ട്ടിലുണ്ട്. റിപ്പോര്ട്ട് കണ്ട മുഖ്യമന്ത്രി മൂന്നുപേരെയും പിരിച്ചുവിടാനുള്ള നടപടിയിലേക്ക് നീങ്ങാന് ആഭ്യന്തര വകുപ്പ് പ്രിന്സിപ്പല് സെക്രട്ടറിക്ക് നിര്ദേശം നല്കിയിട്ടുണ്ട്.