ആലപ്പുഴ: സ്ത്രീ വിരുദ്ധ പരാമര്‍ശത്തില്‍ മന്ത്രി ജി.സുധാകരനെതിരേ കേസെടുക്കാന്‍ ഉത്തരവ്. അമ്പലപ്പുഴ കോടതിയാണ് ഇതു സംബന്ധിച്ച്‌ ഉത്തരവ് പുറപ്പെടുവിച്ചത്. മാര്‍ച്ച്‌ 29ന് സുധാകരന്‍ ഹാജരാകണം. സിപിഎം മുന്‍ ബ്രാഞ്ച് സെക്രട്ടറി നല്‍കിയ പരാതിയിലാണ് നടപടി. ജി.സുധാകരന്‍ സ്ത്രീകളെ പൊതുപരിപാടിയില്‍ പരസ്യമായി അധിക്ഷേപിച്ചെന്നാണ് പരാതിയിലെ ആരോപണം. പരാതി പരിഗണിച്ച കോടതി, സ്ത്രീത്വത്തെ അപമാനിച്ചെന്ന വകുപ്പ് ചുമത്തി സുധാകരനെതിരേ കേസെടുക്കാന്‍ പോലീസിനു നിര്‍ദേശം നല്‍കി. സംഭവത്തില്‍ നേരത്തെ പരാതി നല്‍കിയിരുന്നെങ്കിലും പോലീസ് കേസെടുത്തിരുന്നില്ല.
