വര്ക്കല: ശ്രീനാരായണ മന്ത്രധ്വനികളാല് മുഖരിതമായ ശിവഗിരിയില് എണ്പത്തിയഞ്ചാമത് തീര്ത്ഥാടന മഹാമഹത്തിന് ശിവഗിരിയില് തുടക്കമായി. ശിവഗിരി മഹാസമാധി മന്ദിരത്തില് ശ്രീനാരായണ ഗുരുദേവന്റെ വെണ്ണക്കല് പ്രതിമ പ്രതിഷ്ഠിച്ചതിന്റെ കനകജൂബിലിയുടെയും, കോട്ടയം നാഗമ്പടം ക്ഷേത്രത്തില് ശിവഗിരി തീര്ത്ഥാടനത്തിന് ഗുരുദേവന് അനുമതി നല്കിയതിന്റെ നവതിയുടെയും നിറവിലാണ് ഇത്തവണത്തെ തീര്ത്ഥാടനം. രാവിലെ 7.30ന് സ്വാമി പ്രകാശാനന്ദ ധര്മ്മപതാക ഉയര്ത്തി. 10ന് സമ്മേളനം മുഖ്യമന്ത്രി പിണറായി വിജയന് ഉദ്ഘാടനം ചെയ്യും.
സ്വാമി പ്രകാശാനന്ദ ഭദ്രദീപം തെളിക്കും. ശ്രിനാരായണ ധര്മസംഘം ട്രസ്റ്റ് പ്രസിഡന്റ് സ്വാമി വിശുദ്ധാനന്ദ അധ്യക്ഷത വഹിക്കും. കേന്ദ്ര ആഭ്യന്തര സഹമന്ത്രി ഹന്സ് രാജ് ഗംഗാറാം അഹിര്, ശ്രീലങ്കന് സ്പീക്കര് കാരു ജയസൂര്യ, പ്രതിപക്ഷനേതാവ് രമേശ് ചെന്നിത്തല എന്നിവര് മുഖ്യാതിഥികളാകും. അസോഛം സര്വിസ് എക്സലന്സ് അവാര്ഡ് ജേതാവ് സുരേഷ്കുമാറിനെയും മികച്ച ബാലനടനുള്ള ദേശീയ അവാര്ഡ് ജേതാവ് ആദിഷ് പ്രവീണിനെയും ആദരിക്കും. ശിവഗിരി മഠം ‘മൈ സ്റ്റാമ്പി’ന്റെയും തപാല് കവറിന്റെയും പ്രകാശനം ചീഫ് പോസ്റ്റ് മാസ്റ്റര് ജനറല് അഞ്ജലീ ആനന്ദ് നിര്വഹിക്കും. ഉച്ചക്ക് ഒന്നിന് വിദ്യാഭ്യാസം, സംഘടന എന്നിവ വിഷയമാകുന്ന സെമിനാര് മന്ത്രി പ്രഫ. സി. രവീന്ദ്രനാഥ് ഉദ്ഘാടനം ചെയ്യും.
ഇനി മൂന്ന് നാള് നാടിന്റെ എല്ലാ വഴികളും മഞ്ഞ നദികളായി ഇവിടേക്ക് ഒഴുകിയെത്തും. തീര്ത്ഥാടക പ്രവാഹത്തില് ശിവഗിരിക്കുന്നുകള് മഞ്ഞപ്പട്ടണിയും. ഗുരുവിന്റെ വാക്കുകള് സങ്കീര്ത്തനം പോലെ സമ്മേളനങ്ങളിലും സെമിനാറുകളിലും പ്രതിദ്ധ്വനിക്കും. ഗുരുസന്നിധിയില് പ്രണാമങ്ങളര്പ്പിച്ച് തീര്ത്ഥാടക സഹസ്രങ്ങള് കാതോര്ക്കും.