ന്യൂഡല്ഹി: മുനമ്പം മനുഷ്യക്കടത്തുമായി ബന്ധപ്പെട്ട് ദില്ലിയില് നിന്ന് കസ്റ്റഡിയിലെടുത്ത ദീപകിന്റെ മൊഴി പുറത്ത്. യാത്രക്കായി ഒരാള്ക്ക് ഒന്നര ലക്ഷം രൂപ വീതം നല്കിയെന്ന് ദീപക് മൊഴി നല്കി.
ഇരുന്നൂറോളം പേരാണ് ഓസ്ട്രേലിയയിലേക്ക് യാത്രതിരിച്ചത്. ദീപകിന്റെ ഭാര്യയും കുഞ്ഞും യാത്രാസംഘത്തിലുണ്ട്. ദീപക്, പ്രഭു എന്നിവര് ദില്ലി പൊലീസിന്റെ കസ്റ്റഡിയിലാണ് ഇപ്പോള്. ഇരുവരെയും ഇന്ന് കൊച്ചിയില് എത്തിക്കും. കഴിഞ്ഞ ദിവസം ബോട്ടില് കയറാന് കഴിയാതിരുന്ന ഇവരെ ഡല്ഹിയിലെ മന്ദഗിരി കോളനിയില് നിന്നാണ് പിടികൂടിയത്. ഇവരെ ചോദ്യം ചെയ്തതില് നിന്ന് നിര്ണായക വിവരങ്ങള് ലഭിച്ചെന്ന് പോലീസ് പറഞ്ഞു.
മുനമ്പം മനുഷ്യക്കടത്ത് കേസില് ബോട്ടുടമ അനില്കുമാറിനെ പൊലീസ് നേരത്തെ അറസ്റ്റ് ചെയ്തിരുന്നു. ഓസ്ട്രേലിയയിലേക്ക് കടന്ന സംഘത്തിന് ബോട്ട് വാങ്ങി നല്കാന് കൂട്ടുനിന്നത് അനില്കുമാര് ആണെന്ന് പൊലീസ് കണ്ടെത്തി. മനുഷ്യക്കടത്തിന് പിന്നില് പ്രവര്ത്തിച്ചവരെല്ലാം തമിഴ്നാട് സ്വദേശികള് ആണെന്നാണ് പോലീസ് കണ്ടെത്തല്.
കഴിഞ്ഞ ഞായറാഴ്ചയാണ് മുനമ്പത്ത് നിന്ന് മനുഷ്യക്കടത്ത് നടന്നതായി പോലീസ് സ്ഥിരീകരിച്ചത്. ഉപേക്ഷിക്കപ്പെട്ട നിലയില് ബാഗുകള് കണ്ടെത്തിയതിനെ തുടര്ന്നാണ് മനുഷ്യക്കടത്തെന്ന നിഗമനത്തില് പോലീസെത്തിയത്.