തിരുവനന്തപുരം: കായല്‍ കൈയേറ്റവുമായി ബന്ധപ്പെട്ട് ഹൈക്കോടതിയില്‍ നിന്നും രൂക്ഷ വിമര്‍ശനം നേരിടേണ്ടി വന്ന ഗതാഗത മന്ത്രി തോമസ് ചാണ്ടിയോട് രാജിയാണ് നല്ലതെന്ന് മുഖ്യമന്ത്രി അറിയിച്ചതായി സൂചന. ബുധനാഴ്ച രാവിലെ ക്ലിഫ് ഹൗസില്‍ നടത്തിയ കൂടിക്കാഴ്ചയ്ക്ക് ശേഷമായിരുന്നു മുഖ്യമന്ത്രി ഇക്കാര്യം അറിയിച്ചത്.
കേന്ദ്ര നേതൃത്വവുമായി ആലോചിച്ച്‌ കാര്യങ്ങള്‍ അറിയിക്കാമെന്ന് യോഗത്തിന് ശേഷം എന്‍.സി.പി നേതാക്കള്‍ മുഖ്യമന്ത്രിയോട് അറിയിച്ചു. അതോടെ രാജിയില്‍ തീരുമാനം ഉച്ചയ്ക്ക് മുമ്പ് ഉണ്ടാകുമെന്നാണ് സൂചന.
ചൊവ്വാഴ്ച കൊച്ചിയില്‍ നടന്ന പാര്‍ട്ടി സംസ്ഥാന നേതൃയോഗത്തില്‍ ഭൂരിപക്ഷം അംഗങ്ങളും തോമസ് ചാണ്ടിയുടെ രാജി ആവശ്യപ്പെട്ടു. എന്നാല്‍, കേന്ദ്രനേതൃത്വം തീരുമാനിക്കട്ടെ എന്ന നിലപാടാണ് പീതാംബരന്‍ സ്വീകരിച്ചത്. ഇതിനോട് മുന്‍ മന്ത്രി എ.കെ. ശശീന്ദ്രനടക്കം ശക്തമായ എതിര്‍പ്പ് പ്രകടിപ്പിച്ചിരുന്നു. കേന്ദ്ര നിലപാട് വരുന്നതിന് മുമ്പു തന്നെ തീരുമാനം വേണമെന്ന് വൈകീട്ട് നടന്ന സംസ്ഥാന ഭാരവാഹി യോഗത്തിലും പല മുതിര്‍ന്ന നേതാക്കളും ആവശ്യപ്പെട്ടു.
തുടര്‍ന്നാണ് പീതാംബരന്‍ ഇന്ന് രാവിലെ ഒമ്പതിന് മുഖ്യമന്ത്രിയെയും ഘടകകക്ഷി നേതാക്കളെയും കാണാന്‍ തീരുമാനിച്ചത്. രാജി വേണമെന്നാണ് മുഖ്യമന്ത്രിയുടെ നിലപാടെങ്കില്‍ കൂടുതല്‍ ചര്‍ച്ചകള്‍ക്ക് നില്‍ക്കാതെ മന്ത്രിയോട് രാജി ആവശ്യപ്പെടാന്‍ പീതാംബരനെ ചുമതലപ്പെടുത്തിയാണ് യോഗം പിരിഞ്ഞത്.
