ചെന്നൈ: രാഷ്ട്രീയ പ്രവേശന അഭ്യൂഹങ്ങള് ശക്തമാക്കിക്കൊണ്ട് ആരാധകരുമായി വീണ്ടും കൂടിക്കാഴ്ചക്കൊരുങ്ങി രജനികാന്ത്. കോടമ്പാക്കത്ത് സ്വന്തം ഉടമസ്ഥതയിലുള്ള രാഘവേന്ദ്ര കല്യാണ മണ്ഡപത്തില് ഡിസംബര് 26 മുതല് 31 വരെ രാവിലെ എട്ടു മുതല് ഉച്ചതിരിഞ്ഞ് മൂന്നുവരെയാണ് അദ്ദേഹം ആരാധകരെ കാണുക. ദിവസം ആയിരം പേരെയായിരിക്കും അദ്ദേഹം കാണുക എന്നും സൂചനയുണ്ട്.
ആരാധകരുമായുള്ള കൂടിക്കാഴ്ചക്ക് സുരക്ഷ ആവശ്യപ്പെട്ട് രജനീകാന്ത് ഫാന്സ് അസോസിയേഷന് പൊലീസ് കമീഷണര്ക്കു നല്കിയ കത്ത് പുറത്തായതോടെയാണ് ഈ കാര്യങ്ങള് പുറം ലോകമറിയുന്നത്. മേയ് മാസത്തില് അദ്ദേഹം ആരാധകരമായി കൂടിക്കാഴ്ച നടത്തിയിരുന്നു. യുദ്ധം വരുമ്പോള് നമുക്ക് ഒരുമിക്കാം എന്നു പറഞ്ഞായിരുന്നു അദ്ദേഹം അവസാന സംഗമം പിരിഞ്ഞത്. ഇതിലാണ് രജനീകാന്ത് രാഷ്ട്രീയത്തിലേക്ക്ക് ചുവടുകള് വെയ്ക്കാനൊരുങ്ങുന്നുവെന്ന സൂചനകള് ശക്തമായത്.
ഡിസംബര് 12 നായിരുന്നു രജനിയുടെ പിറന്നാല്. എന്നാല്, പിറന്നാള് ദിവസം ആരാധകരെ കാണുമെന്ന് അഭ്യൂഹങ്ങള് ഉണ്ടായിരുന്നെങ്കിലും ആരാധകരെ കാണാന് അദ്ദേഹം തയാറായിരുന്നില്ല. ഇനി വരുന്ന കൂടിക്കാഴ്ചയില് രജനിയുടെ രാഷ്ട്രീയപ്രവേശന നിലപാട് വ്യക്തമാക്കുമോ എന്നാണ് സിനിമാ-രാഷ്ട്രീയ ലോകം ഉറ്റുനോക്കുന്നത്.