ന്യൂഡല്ഹി: ലോയ കേസില് പ്രത്യേക അന്വേഷണം ആവശ്യപ്പെട്ടുള്ള ഹരജികള് സുപ്രീംകോടതി തള്ളി. ഗൂഢലക്ഷ്യമുള്ള ഹരജികള് നിരുത്സസാഹപ്പെടുത്തണമെന്ന് അഭിപ്രായപ്പെട്ടാണ് സുപ്രീംകോടതി ഹരജി തള്ളിയത്. ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ എ.എം. ഖാന്വില്കര്, ഡി.വൈ. ചന്ദ്രചൂഡ് എന്നിവരടങ്ങുന്ന ബെഞ്ചാണ് ഹരജികള് പരിഗണിച്ചത്.
ലോയയുടെ മരണം സംബന്ധിച്ച് അദ്ദേഹത്തിന്റെ സഹ ജഡ്ജിമാര് നല്കിയ മൊഴികള് അവിശ്വസിക്കേണ്ടതില്ലെന്ന് സുപ്രീംകോടതി വ്യക്തമാക്കി. കോടതിയെ സംശയത്തിെന്റ നിഴലിലാക്കുന്നതാണ് ഇതുമായി ബന്ധപ്പെട്ട ഹരജികള്. രാഷ്ട്രീയ-ബിസിനസ് തര്ക്കങ്ങള് കോടതിക്ക് പുറത്ത് തീര്ക്കണമെന്ന രൂക്ഷമായ വിമര്ശനം ഉന്നയിച്ചാണ് ലോയ കേസില് അന്വേഷണം ആവശ്യപ്പെട്ടുള്ള ഹരജികള് സുപ്രീംകോടതി തള്ളിയിരിക്കുന്നത്.
ബി.ജെ.പി ദേശീയ അധ്യക്ഷന് അമിത് ഷാ പ്രതിയായ സൊഹ്റാബുദ്ദീന് വ്യാജ ഏറ്റുമുട്ടല് കേസിന്റെ വിചാരണക്കിടെയായിരുന്നു ജസ്റ്റിസ് ബി.എച്ച് ലോയയുടെ മരണം. സഹപ്രവര്ത്തകന്റെ മകളുടെ വിവാഹത്തില് സംബന്ധിക്കാന് പോയ അദ്ദേഹം 2014 ഡിസംബര് ഒന്നിന് നാഗ്പുരിലാണ് മരണപ്പെട്ടത്.