ഇടുക്കി: ഇടുക്കിയില് ചെറുതോണി അണക്കെട്ടിന്റെ അഞ്ചാമത്തെ ഷട്ടര് തുറന്നു. ജലനിരപ്പ് 2401.60 അടിയായ സാഹചര്യത്തിലാണ് അഞ്ചാമത്തെ ഷട്ടറും തുറന്നത്.
വെള്ളിയാഴ്ച്ച രാവിലെ ഏഴ് മണിക്ക് രണ്ട്, മൂന്ന് ഷട്ടറുകള് തുറന്നതിന് പിന്നാലെയാണ് ഉച്ചയ്ക്ക് ഒരു മണിയോടെ നാലാമത്തെ ഷട്ടറും ഒന്നരയോടെ അഞ്ചാമത്തെ ഷട്ടറും തുറന്നത്. ഇടുക്കി പദ്ധതി പ്രദേശത്ത് ശക്തമായ രീതിയില് മഴ തുടരുന്നതോടെയാണ് മുഴുവന് ഷട്ടറുകളും തുറക്കേണ്ട അവസ്ഥയുണ്ടായത്. ഇടുക്കി ഡാമില് നിന്നും എത്തുന്ന വെള്ളം പത്ത് മിനിറ്റ് കൊണ്ട് ചെറുതോണിയിലും നാല് മുതല് അഞ്ച് മണിക്കൂറില് ആലുവയിലും എത്തും.
അഞ്ചാമത്തെ ഷട്ടര് കൂടി തുറക്കുന്നതോടെ സെക്കന്ഡില് അറുന്നൂറ് ഘനയടി വെള്ളമായിരിക്കും ഡാമില് നിന്നും ഒഴുകിയെത്തുക. ചെറുതോണി അണക്കെട്ടിന്റെ താഴെയുള്ളവരും പെരിയാറിന്റെ ഇരുകരകളിലുള്ളവരും അതീവ ജാഗ്രത പുലര്ത്തണമെന്ന് നിര്ദേശം നല്കിയിട്ടുണ്ട്. പുഴയില് ഇറങ്ങുന്നതിനും കുളിക്കുന്നതിനും മീന്പിടിക്കുന്നതിനും സെല്ഫി എടുക്കുന്നതിനും കര്ശന നിരോധനവും ഏര്പ്പെടുത്തിയിട്ടുണ്ട്.