മുംബൈ: കമല മില്സിലെ മൂന്ന് പബുകളിലുണ്ടായ തീപിടിത്തവുമായി ബന്ധപ്പെട്ട് മൂന്ന് ദിവസത്തിന് ശേഷം അപകടം നടന്ന പബിലെ രണ്ട് മാനേജര്മാരെ പൊലീസ് അറസ്റ്റ് ചെയ്തു. വണ്-എബവ് പബിലെ മാനേജര്മാരായ കെവിന് ബാവ, ലിസ്ബണ് ലോപ്പസ് എന്നിവരാണ് അറസ്റ്റിലായത്.
ലോവര് പരേലിലെ പ്രധാന വാണിജ്യ സമുച്ചയമായ കമല മില്സില് ഡിസംബര് 29നുണ്ടായ തീപിടിത്തത്തില് 14 പേരാണ് മരിച്ചത്. അപകടം നടന്ന സമയത്ത് ഇരുവരും സ്ഥലത്തുണ്ടായിരുന്നുവെങ്കിലും അതിഥികളെ സഹായിക്കാന് നില്ക്കാതെ ഓടി രക്ഷപ്പെടുകയായിരുന്നുവെന്ന് പൊലീസ് പറഞ്ഞു.
തീപിടിച്ച പബുകളിലൊന്നായ വണ് എബൗവിന്റെ ഉടമകള്ക്ക് ഒളിക്കാന് സൗകര്യമൊരുക്കിയവരെ ഇന്നലെ പൊലീസ് അറസ്റ്റ് ചെയ്തിരുന്നു. ഭൊയ്വാദ കോടതിയില് ഹാജരാക്കിയ ഇവര്ക്ക് 25,000രൂപ വീതമുള്ള ബോണ്ടില് ജാമ്യം അനുവദിച്ചു. എന്നാല് കേസിലെ പ്രധാന പ്രതികളും കെട്ടിട ഉടമകളുമായ ഹിതേഷ് സാംഗ്വി, ജിഗാര് സാംഗ്വി, അഭിജിത്ത് മങ്കാര് എന്നിവരെ ഇതുവരെ പിടികൂടാന് പൊലീസിന് കഴിഞ്ഞിട്ടില്ല.
സംഭവത്തില് 11 യുവതികളുള്പ്പെടെ 14 പേരാണ് മരിച്ചത്. പബില് പിറന്നാള് ആഘോഷിച്ചുകൊണ്ടിരുന്ന പെണ്കുട്ടികളും കൊല്ലപ്പെട്ടവരില് ഉള്പ്പെടുന്നു. പരിക്കേറ്റവര് ചികിത്സയിലാണ്.