തിരുവനന്തപുരം: എസ് എ പി ക്യാമ്ബില് നിന്നും വെടിയുണ്ടകള് കാണാതായ സംഭവത്തില് പ്രാധാന സാക്ഷികളായ പോലീസ് ഉദ്യോഗസ്ഥരെ ക്രൈംബ്രാഞ്ച് ഇന്ന് ചോദ്യം ചെയ്യും. തിരകള് നഷ്ടമായ കാലയളവില് എസ് എ പിയില് ജോലി ചെയ്തിരുന്ന നാല് പൊലീസുകാരെയാണ് ഇന്ന് ചോദ്യം ചെയ്യുന്നത് . ഇവരുടെ മൊഴിയുടെ അടിസ്ഥാനത്തില് തുടര് നടപടികള് സ്വീകരിക്കാനാണ് ക്രൈംബ്രാഞ്ചിന്റെ തീരുമാനം . കഴിഞ്ഞ ദിവസം നടത്തിയ പരിശോധനയില് നിന്നും അന്വേഷണ സംഘം വ്യാജ വെടിയുണ്ടകള് കണ്ടെത്തിയിരുന്നു.
കേരളാ പൊലീസിന്റെ ആയുധശേഖരത്തില് നിന്ന് വന്തോതില് വെടിക്കോപ്പുകളും ഉണ്ടകളും റൈഫിളുകളും കാണാതായെന്നാണ് സിഎജി റിപ്പോര്ട്ടില് പ്രധാനമായും ചൂണ്ടികാട്ടുകുന്നത് . 12,061 വെടിയുണ്ടകളുടെ കുറവാണ് കണ്ടെത്തിയിരിക്കുന്നത് സിഎജി വ്യക്തമാക്കുന്നു . കാണാതായവയ്ക്ക് പകരം വ്യാജ വെടിയുണ്ടകള് വയ്ക്കുകയും സംഭവം മറച്ചു വയ്ക്കാന് ഉദ്യോഗസ്ഥര് ശ്രമിക്കുകയും ചെയ്തു. രേഖകള് തിരുത്തി കുറ്റക്കാരെ സംരക്ഷിക്കാനാണ് ബന്ധപ്പെട്ട ഉദ്യോഗസ്ഥര് ശ്രമിച്ചതെന്നും സിഎജി കണ്ടെത്തിയിട്ടുണ്ട്.
എന്നാല്, തോക്കുകളും വെടിയുണ്ടകളും കാണാതായിയെന്ന സിഎജി കണ്ടെത്തലുകള് തള്ളി ഇന്നലെ ആഭ്യന്തര സെക്രട്ടറി മുഖ്യമന്ത്രിക്ക് റിപ്പോര്ട്ട് സമര്പ്പിച്ചിരുന്നു . തോക്കുകള് കാണാതായിട്ടില്ലെന്ന ക്രൈംബ്രാഞ്ചിന്റെ കണ്ടെത്തല് ശരിവച്ചുകൊണ്ടാണ് റിപ്പോര്ട്ട്. രജിസ്റ്ററില് രേഖപ്പെടുത്തുന്നതിലെ പിഴവ് മാത്രമാണ് ഉണ്ടായതെന്നാണ് റിപ്പോര്ട്ടിലൂടെ പറയുന്നത് .