ന്യൂഡല്ഹി: പുല്വാമയിലെ ഭീകരാക്രമണത്തിന്റെ പശ്ചാത്തലത്തില് പാകിസ്ഥാന് സിനിമാപ്രവര്ത്തകര്ക്ക് ഇന്ത്യയില് വിലക്ക്. ഓള് ഇന്ത്യ സിനി വര്ക്കേഴ്സ് അസോസിയേഷനാണ് ഇത് സംബന്ധിച്ച റിപ്പോര്ട്ട് പുറത്ത് വിട്ടത്.
‘ജമ്മുകശ്മീരില് നടന്ന ഭീകരാക്രമണത്തെ ശക്തമായി അപലപിക്കുന്നു. ആക്രമണത്തില് കൊല്ലപ്പെട്ട ജവാന്മാര്ക്ക് അനുശോചനം രേഖപ്പെടുത്തുന്നു. ഭീകരാക്രമണത്തിനും മനുഷ്യത്വമില്ലാതയ്മക്കുമെതിരെ ഓള് ഇന്ത്യ സിനി വര്ക്കേഴ്സ് അസോസിയേഷനും രാജ്യത്തോടൊപ്പം നില്ക്കുന്നു’ അതിനാല് പാക് സിനിമാപ്രവര്ത്തകര്ക്ക് രാജ്യത്ത് വിലക്ക് ഏര്പ്പെടുത്തുന്നുവെന്നും സംഘടന അറിയിച്ചു.
നമ്മുടെ രാജ്യത്തെ സിനിമാപ്രവര്ത്തകരില് ആരെങ്കിലും അവരോടൊപ്പം ചേര്ന്ന് പ്രവര്ത്തിക്കുകയാണെങ്കില് അവര്ക്കും വിലക്ക് നേരിടേണ്ടിവരുമെന്നും എ.ഐ.സി.ഡബ്ലൂ.എ പുറത്തിറക്കിയ പത്രക്കുറിപ്പില് വ്യക്തമാക്കി. ഉറി ഭീകരാക്രമണത്തിന്റെ പശ്ചാത്തലത്തിലും പാക്ക് താരങ്ങള് അനൗദ്യോഗിക വിലക്ക് ഏര്പ്പെടുത്തിയിരുന്നു.
തുടര്ന്ന് ആ സമയത്ത് പാക്ക് താരങ്ങളെ ചിത്രീകരിച്ചു കൊണ്ടിരിക്കുന്ന ഏതാനും സിനിമകള് പ്രതിസന്ധിയിലായി. ഒരുപാട് പ്രതിഷേധങ്ങള്ക്കൊടുവിലാണ് ചിത്രങ്ങള് പുറത്തിറങ്ങിയത്.