മൂന്നാര്: കയ്യേറ്റങ്ങള്ക്കെതിരെ റവന്യൂ, വനം വകുപ്പുകള് സ്വീകരിച്ചു വരുന്ന നടപടികളില് പ്രതിഷേധിച്ച് സിപിഎമ്മിന്റെ നേതൃത്വത്തില് മൂന്നാര് ജനകീയ സമിതി ആഹ്വാനം ചെയ്ത ഹര്ത്താല് ആരംഭിച്ചു.
രാവിലെ ആറുമുതല് വൈകിട്ട് ആറു വരെയാണ് ഹര്ത്താല്. പള്ളിവാസല്, മൂന്നാര്, ബൈസണ്വാലി, ചിന്നക്കനാല്, ശാന്തന്പാറ, മറയൂര്, കാന്തല്ലൂര്, വട്ടവട, വെള്ളത്തൂവല് എന്നീ പഞ്ചായത്തുകളിലാണ് ഹര്ത്താല്.
ഇതിനിടെ മൂന്നാറിലെ വിവിധയിടങ്ങളില് പരക്കെ അക്രമം നടന്നു. വിദേശ ടൂറിസ്റ്റുകളുമായി എത്തിയ ടാക്സി ഡ്രൈവര്ക്ക് മര്ദനമേറ്റു. മൂന്നാര് സ്വദേശി കുട്ടനാണ് മര്ദനമേറ്റത്. സംഭവം കണ്ടിട്ടും പൊലീസ് വെറുതെ നോക്കി നിന്നെന്ന് ആരോപണമുണ്ട്. ഹര്ത്താലിനിടെ മാധ്യമപ്രവര്ത്തകര്ക്ക് നേരെയും കയ്യേറ്റ ശ്രമമുണ്ടായി. ഇരുചക്രവാഹങ്ങള് മറിച്ചിട്ടു. കടകള് ബലംപ്രയോഗിച്ച് അടപ്പിച്ചു. റോഡില് കുപ്പിച്ചില്ലുകള് വിതറി.