ലിഫ്റ്റില് കുടുങ്ങി, പുറത്തെത്തിക്കാന് ശ്രമിക്കുന്നതിനിടെ അതിവേഗം താഴേക്കു പതിച്ചു; 62കാരി മരിച്ചു
മുംബൈ: മഹാരാഷ്ട്രയില് ലിഫ്റ്റില് കുടുങ്ങിയ അറുപത്തിരണ്ടുകാരി മരിച്ചു. നാലാം നിലയില്നിന്നു താഴേക്കു വരുന്നതിനിടെ ലിഫ്റ്റ് നിലയ്ക്കുകയായിരുന്നു.
പിന്നീട് ഇവരെ പുറത്തെത്തിക്കാനുള്ള ശ്രമത്തിനിടെ അതിവേഗത്തില് താഴേക്കു പതിച്ചു.
ചാര്പോക്കിലാണ് സംഭവം. നാലാം നിലയിലെ വീട്ടില്നിന്നു പ്രഭാത സവാരിക്കായി പുറത്തേക്കു വരികയായിരുന്നു സ്ത്രീ. നാലാം നിലയ്ക്കും മൂന്നാം നിലയ്ക്കും ഇടയില് വച്ച് ലിഫ്റ്റ് നിലച്ചു. അമ്മയുടെ നിലവിളി കേട്ട് മകന് എത്തി ലിഫ്റ്റ് തുറക്കാന് ശ്രമിച്ചെങ്കിലും കഴിഞ്ഞില്ല. ഇതിനിടെ മകനു ഇലക്ട്രിക് ഷോക്ക് ഏറ്റു. ഒപ്പം കറന്റ് ഓഫ് ആവുകയും ചെയ്തു.
സെക്യൂരിറ്റി ജീവനക്കാര് എത്തി ലിഫ്റ്റ് തുറക്കാന് ശ്രമിക്കുന്നതിനിടെ അതിവേഗം താഴേക്കു പതിക്കുകയായിരുന്നു. ഗുരുതര പരിക്കേറ്റ് സ്ത്രിയെ ആശുപത്രിയില് എത്തിച്ചെങ്കിലും രക്ഷിക്കാനായില്ല.