ന്യൂഡല്‍ഹി: ഇന്ത്യയില്‍ തൊഴിലില്ലായ്മ നിരക്ക് ഫെബ്രുവരിയില്‍ വര്‍ധിച്ചതായി കണക്കുകള്‍. തൊഴിലില്ലാത്തവരുടെ എണ്ണം 7.78 ശതമാനമായി ഉയര്‍ന്നു. ജനുവരിയില്‍ 7.16 ശതമാനമായിരുന്നു.
2019 ഒക്ടോബര്‍ മുതലുള്ള ഏറ്റവും ഉയര്‍ന്ന തൊഴിലില്ലായ്മ നിരക്കാണ് ഇതെന്ന് സെന്‍റര്‍ ഫോര്‍ മോണിറ്ററിങ് ഇന്ത്യന്‍ ഇക്കോണമി (സി.എം.ഐ.ഇ) യുടെ കണക്കുകള്‍ വ്യക്തമാക്കുന്നു.
ഇന്ത്യയില്‍ തൊഴിലില്ലായ്മ നിരക്ക് വര്‍ധിക്കുന്നത് സമ്ബദ് വ്യവസ്ഥയെ പ്രതികൂലമായി ബാധിക്കുമെന്നാണ് വിലയിരുത്തല്‍.
കഴിഞ്ഞ ആറുവര്‍ഷത്തെ അപേക്ഷിച്ച്‌ ഇന്ത്യയിലെ തൊഴില്‍രഹിതരുടെ എണ്ണത്തില്‍ വന്‍വര്‍ധനയാണ് 2019 ലെ അവസാന മൂന്നുമാസങ്ങളില്‍ രേഖപ്പെടുത്തിയത്. ആഗോള തലത്തില്‍ കൊറോണ വൈറസ് പിടിമുറുക്കിയതും വിപണിയെയും സമ്ബദ് വ്യവസ്ഥയെയും ഇവ പ്രതികൂലമായി ബാധിച്ചതും തൊഴില്‍ നിരക്ക് കുറയാന്‍ ഇടയാക്കി.
ഗ്രാമീണ മേഖലയിലെ ജനങ്ങളെയാണ് ഇത് കൂടുതല്‍ ദുരിതത്തിലാക്കിയത്. ഗ്രാമീണ മേഖലയിലെ തൊഴിലില്ലായ്മ നിരക്ക് 7.37 ശതമാനമായാണ് വര്‍ധിച്ചത്. 5.97 ശതമാനത്തില്‍നിന്നാണ് 7.37 ശതമാനമായി വര്‍ധിച്ചത്. അതേസമയം നഗര പ്രദേശങ്ങില്‍ ജനുവരിയെ അപേക്ഷിച്ച്‌ തൊഴിലില്ലായ്മ നിരക്ക് 8.65 ശതമാനമായി താഴ്ന്നിട്ടുണ്ട്. ജനുവരിയില്‍ ഇത് 9.70 ശതമാനമായിരുന്നു.
