ഒരു ഗ്ലാസ് പാല്‍ കുടിക്കുന്നത് ഇന്ത്യയിലെ അമ്മമാരുടെ പുരാതന കാലം മുതലുള്ള പോഷകഹാര ശീലങ്ങളില്‍പെട്ടതാണ്. അളവില്ലാത്ത പോഷകഗുണം പാലിനെ സമീകൃത ആഹാരമാക്കി മാറ്റുന്നു.
പ്രോട്ടീന്‍, കാര്‍ബോ ഹൈഡ്രേറ്റ്, കൊഴുപ്പ്, ഫൈബര്‍ ഇരുമ്ബ് തുടങ്ങിയ അവശ്യ പോഷകഘടകങ്ങളെല്ലാം പാലില്‍ അടങ്ങിയിട്ടുണ്ട്. എന്നാല്‍ പാല്‍ കുടിക്കുന്ന സമയം സംബന്ധിച്ച്‌ പലരും ബോധവാന്‍മാരല്ല. മല്‍സ്യ വിഭവങ്ങള്‍ക്കൊപ്പം പാല്‍ കഴിക്കരുതെന്ന് പറയാറുണ്ട്.
ഇതുപോലെ തന്നെ ഭക്ഷണക്രമത്തില്‍ പ്രശ്നം ഉണ്ടാക്കുന്നതാണ് കോഴിയിറച്ചി വിഭവങ്ങള്‍ക്കൊപ്പം പാല്‍ കഴിക്കുന്നതെന്നും പറയാറുണ്ട്. ഇവ വെള്ളപ്പാണ്ടിന് കാരണമാകുമെന്നും പറയാറുണ്ട്. ഇൗ നിര്‍ദേശത്തിന് പിന്നിലെ യാഥാര്‍ഥ്യമെന്താണ്?
മെലാനിന്‍റെ കുറവാണ് പ്രാഥമികമായി വെള്ളപ്പാണ്ടിനുള്ള കാരണം. ശരീരത്തിലെ മെലാനൊസൈറ്റ്സ് പ്രവര്‍ത്തനം നിലക്കുമ്പോള്‍ ആണ് വെള്ള അടയാളങ്ങള്‍ രൂപപ്പെടുന്നത്. ചര്‍മത്തിലെ മെലാനിനെ ഉല്‍പ്പാദിപ്പിക്കുന്ന കോശങ്ങളാണ് മെലാനോ സൈറ്റ്സ്. ഇവയാണ് ചര്‍മത്തിന് നിറം നല്‍കുന്നത്. ശരീരത്തിലെ ആന്‍റിബോഡീസ് ലിംഫോസൈറ്റ്സ് എന്നിവയുമായി ബന്ധപ്പെട്ടുണ്ടാകുന്ന ഒാട്ടോ ഇമ്യൂണ്‍ തകരാറാണ് ശരീരത്തില്‍ ഇൗ അവസ്ഥ സൃഷ്ടിക്കുന്നതെന്ന് ഗവേഷകര്‍ കണ്ടെത്തിയിട്ടുണ്ട്. എന്നാല്‍ കോഴി ഇറച്ചി വിഭവങ്ങള്‍ക്ക് ശേഷം പാല്‍ കുടിക്കുന്നതും ശരീരത്തില്‍ വെള്ളപാടുകള്‍ ഉണ്ടാകുന്നതും തമ്മില്‍ ബന്ധപ്പെടുത്താവുന്ന ശാസ്ത്രീയ തെളിവുകള്‍ ഇതുവരെ ലഭിച്ചിട്ടില്ല.
ഏതാനും വര്‍ഷങ്ങള്‍ക്ക് മുമ്പ് മത്സ്യവും പാലും ഒന്നിച്ച്‌ കഴിക്കുന്നത് സംബന്ധിച്ച്‌ വിവാദമുണ്ടായിരുന്നു. എന്നാല്‍ ക്ലിനിക്കല്‍തലത്തില്‍ ഇക്കാര്യത്തില്‍ ഒന്നും തെളിയിക്കാനായിട്ടില്ല. കോഴി ഇറച്ചിയുടെ കാര്യത്തിലും ഇതുതന്നെയാണ് സ്ഥിതി. എന്നാല്‍ ഇൗ ഭക്ഷണങ്ങള്‍ക്കിടയില്‍ ചെറിയ ഇടവേള നല്‍കുന്നത് നല്ലതാണെന്ന് ഉപദേശിക്കുന്ന വിദഗ്ദരുമുണ്ട്. അമിതമായ അളവിലെ പ്രോട്ടീന്‍ യൂറിക് ആസിഡിന്‍റെ ഉല്‍പ്പാദനം വര്‍ധിപ്പിക്കാന്‍ വഴിവെക്കുമെന്നും ഇവര്‍ ചൂണ്ടിക്കാട്ടുന്നു. അതുകൊണ്ട് തന്നെ അരമണിക്കൂര്‍ ഇടവേള നല്ലതാണെന്നും ഇവര്‍ ചൂണ്ടിക്കാട്ടുന്നു.
