തിരുവനന്തപുരം: ദേശീയ മെഡിക്കല്‍ കമീഷന്‍ ബില്ലിനെതിരെ ഡോക്ടര്‍മാരുടെ സംഘടനയായ ഇന്ത്യന്‍ മെഡിക്കല്‍ അസോസിയേഷന്‍ (ഐ.എം.എ) ആഹ്വാനം ചെയ്ത 12 മണിക്കൂര്‍ രാജ്യവ്യാപക പണിമുടക്ക് സംസ്ഥാനത്ത് ആരംഭിച്ചു. ഇതോടെ ജനങ്ങള്‍ വലഞ്ഞിരിക്കുകയാണ്.
കേരളത്തില്‍ രാവിലെ ആറു മുതല്‍ വൈകീട്ട് ആറുവരെ അടിയന്തര രക്ഷാപ്രവര്‍ത്തനങ്ങളും ഗുരുതരമായ പരിചരണ സേവനങ്ങളും ഒഴികെ എല്ലാ ആശുപത്രി സേവനങ്ങളും നിര്‍ത്തിവെച്ചാണ് പണിമുടക്ക്. അതേസമയം, സര്‍ക്കാര്‍ ഡോക്ടര്‍മാരില്‍ ഒരു വിഭാഗം രാവിലെ ഒമ്പതു മുതല്‍ 10 വരെ ഒരു മണിക്കൂര്‍ ഒ.പി ബഹിഷ്കരിക്കും.
ഇതുകൂടാതെ, സ്വകാര്യ പ്രാക്ടീസും നടത്തില്ല. കേരള ഗവ. സ്പെഷലിസ്റ്റ് ഡോക്ടേഴ്സ് അസോസിയേഷന്‍ 12 മണിക്കൂര്‍ സമരത്തില്‍ പങ്കു ചേരുന്നുണ്ട്. സ്വകാര്യ പ്രാക്ടീസില്‍ നിന്ന് ഇവരും വിട്ടുനില്‍ക്കും. അടിയന്തര സ്വഭാവമുള്ള ശസ്ത്രക്രിയകള്‍ മാത്രമേ നടത്തുകയുള്ളൂ.
പണിമുടക്കുന്ന ഡോക്ടര്‍മാര്‍ പകല്‍ 11ന് രാജ്ഭവന് മാര്‍ച്ച്‌ നടത്തും. ഇതിനിടെ ബില്ലിലെ പ്രതിലോമനയങ്ങള്‍ക്കെതിരെ സംസ്ഥാനത്ത് മെഡിക്കല്‍ വിദ്യാര്‍ഥികള്‍ രാജ്ഭവന് മുന്നില്‍ ആരംഭിച്ച അനിശ്ചിതകാല നിരാഹാരസമരം മൂന്നാംദിവസത്തിലേക്ക് കടന്നു
