ഗ്രൂപ്പ് വിഡിയോ കോള്‍ സൗകര്യം ആന്‍ഡ്രോയിഡ്, ഐഫോണ്‍ ഉപഭോക്താക്കളുടെ വാട്‌സ്‌ആപ്പില്‍ താമസിയാതെ എത്തും. പരീക്ഷണാടിസ്ഥാനത്തില്‍ ചില ആന്‍ഡ്രോയിഡ്, ആപ്പിള്‍ ഫോണുകളില്‍ ഇപ്പോള്‍തന്നെ ലഭ്യമായിത്തുടങ്ങിയെന്നാണ് റിപ്പോര്‍ട്ടുകള്‍. ഇപ്പോള്‍ ഗ്രൂപ് വിഡിയോ കോളില്‍ ഒരാള്‍ക്ക് ഒരേസമയം മൂന്നുപേര്‍ക്കാണ് കോള്‍ ചെയ്യാന്‍ കഴിയുക. ഇത് സ്ഥിരമായാല്‍ ആളുകളുടെ എണ്ണം നാലാകും. വാട്‌സ്‌ആപ് നിശ്ചയിച്ചവര്‍ക്കേ ഇൗ സംവിധാനം ഇപ്പോള്‍ ലഭിക്കൂ.
പുതിയ സംവിധാനം വാട്‌സ്‌ആപ്പിന്‍റെ ഐ.ഒ.എസ് പതിപ്പ് 2.18.52 ലും ആന്‍ഡ്രോയിഡ് ബീറ്റ പതിപ്പ് 2.18.145 ന് മുകളിലുള്ളവയിലുമാണ് എത്തിയത്. 2.18.155 ആണ് ആന്‍ഡ്രോയിഡിന്‍റെ ഏറ്റവും പുതിയ ബീറ്റാ പതിപ്പ്. ഭാവിയില്‍ വിഡിയോ കോള്‍ ചെയ്യുമ്പോള്‍ സ്‌ക്രീനില്‍ വലത് മുകളില്‍ കൂടുതല്‍ ആളുകളെ ചേര്‍ക്കാനുള്ള പ്രത്യേക ബട്ടണ്‍ കാണാം. അതില്‍ ക്ലിക്ക് ചെയ്യുമ്ബോള്‍ അടുത്തയാള്‍ക്കുള്ള കോള്‍ കണക്ട് ആവും.
മാത്രമല്ല, ആളുകളെ ചേര്‍ക്കുന്നതോടൊപ്പം സ്‌ക്രീന്‍ വിഭജിക്കപ്പെടുകയും അതില്‍ മറ്റുള്ളവരെ കാണാനും സാധിക്കും. കഴിഞ്ഞ ദിവസം നടന്ന ഫേസ്ബുക് എഫ് 8 ഡെവലപ്പേഴ്‌സ് കോണ്‍ഫറന്‍സില്‍ ഗ്രൂപ് വിഡിയോ കോളിങ്ങും വാട്‌സ്‌ആപ് സ്റ്റിക്കര്‍ സംവിധാനവും എത്തുമെന്ന് വാട്‌സ്‌ആപ്പിെന്‍റ ഉടമകളായ ഫേസ്ബുക് വെളിപ്പെടുത്തിയിരുന്നു.
