അലിഗഡ്: ഉത്തര്‍പ്രദേശിലെ അലിഗഡിലുണ്ടായ വിഷമദ്യ ദുരന്തത്തില്‍ മരിച്ച ആള്‍ക്കാരുടെ എണ്ണം സര്ക്കാര് പുറത്ത് വിട്ടതിന്റെ ഇരട്ടിയിലധികമെന്ന്‌ റിപ്പോര്ട്ട്. വ്യാജ മദ്യ ദുരന്തത്തിനിരയായി മരിച്ചവരെന്നു സംശയിക്കുന്ന 87 പേരുടെ പോസ്റ്റ്മോര്‍ട്ടം ഇതുവരെ നടത്തി. എന്നാല്‍ 35 പേരുടെ മരണം മാത്രമാണ് യുപി സര്ക്കാര് സ്ഥിരീകരിച്ചത്.
ബുധനാഴ്ച 16 പേരുടെ പോസ്റ്റ്മോര്‍ട്ടമാണു നടത്തിയത്. പോസ്റ്റ്മോര്‍ട്ടം നടത്തിയ 71 പേരുടെ മരണകാരണം വ്യാജമദ്യം കഴിച്ചതാണെന്ന് അലിഗഡ് ചീഫ് മെഡിക്കല്‍ ഓഫീസര്‍ ഡോ.ഭാനു പ്രതാപ് കല്യാണി തിങ്കളാഴ്ച മാധ്യമങ്ങളോട് വെളിപ്പെടുത്തിയിരുന്നു ..
അതെ സമയം ആഗ്രയിലെ സര്ക്കാര് ലബോറട്ടറിയില്‍നിന്ന് ഇരകളുടെ മെഡിക്കല്‍ റിപ്പോര്ട്ട് ലഭിച്ചശേഷമേ അവശേഷിക്കുന്ന മരണങ്ങള്‍ ഔദ്യോഗിക കണക്കില്‍ ഉള്‍പ്പെടുത്തുകയുള്ളുവെന്നാണ് ജില്ലാ ഭരണകൂടം അറിയിച്ചിരിക്കുന്നത്.
വ്യാജ മദ്യദുരന്തത്തില്‍ മരിച്ചവരുടെ കണക്കുകളില്‍ വ്യക്തതയില്ലാത്തതിനാല്‍ യുപിയിലെ കോണ്‍ഗ്രസ് നേതൃത്വം മുഖ്യമന്ത്രി യോഗി ആദിത്യനാഥിന് കത്തയക്കുകയും ചെയ്തു. മദ്യദുരന്തവുമായി ബന്ധപ്പെട്ട് ഇതുവരെ 34 പേരെ അറസ്റ്റ് ചെയ്തതായും പോലീസ് വ്യക്തമാക്കി .
