പനജി: ഗോവ രാജ്യാന്തര ചലച്ചിത്രമേളയില് ‘ഈ.മ.യൗ’ എന്ന ചിത്രമൊരുക്കിയ ലിജോ ജോസ് പെല്ലിശേരി മികച്ച സംവിധായകനുള്ള പുരസ്കാരം നേടി. ഇതേ ചിത്രത്തിലെ അഭിനയത്തിന് ചെമ്പന് വിനോദ് മികച്ച നടനുള്ള രജതമയൂരം സ്വന്തമാക്കി.
ആദ്യമായാണ് മലയാളികള്ക്ക് ഈ രണ്ടു പുരസ്കാരങ്ങളും ഒരുമിച്ചു ലഭിക്കുന്നത്. രജത മയൂരവും 15 ലക്ഷം രൂപയുമാണ് മികച്ച സംവിധായകനുള്ള പുരസ്കാരം. മികച്ച നടന് 10 ലക്ഷം രൂപയും രജതമയൂരവും ലഭിക്കും.
മികച്ച സംവിധായകനുള്ള സംസ്ഥാന പുരസ്കാരവും ഈ.മ.യൗവിലൂടെ ലിജോയ്ക്കു ലഭിച്ചിരുന്നു.’വെന് ദ ട്രീസ് ഫോള്’ എന്ന ചിത്രത്തിലൂടെ അനസ്താസിയ പുസ്ടോവിച്ച് മികച്ച നടിക്കുള്ള രജതമയൂരം സ്വന്തമാക്കി. കഴിഞ്ഞ തവണ ‘ടേക്ക് ഓഫി’ലെ അഭിനയത്തിന് പാര്വ്വതി മികച്ച നടിക്കുള്ള രജതമയൂരം സ്വന്തമാക്കിയിരുന്നു.
സെര്ജി ലോസ്നിറ്റ്സ സംവിധാനം ചെയ്ത യുക്രെയ്ന്-റഷ്യന് ചിത്രം ‘ഡോണ്ബാസ്’ മികച്ച ചിത്രത്തിനുള്ള സുവര്ണമയൂരം സ്വന്തമാക്കി. ഡോണ്ബാസ് എന്ന പ്രദേശത്തെ യുദ്ധത്തിന്റെ പശ്ചാത്തലത്തില് കഥ പറഞ്ഞ ചിത്രമാണ് ഡോണ്ബാസ്. മികച്ച നവാഗത സംവിധായകനുള്ള ശതാബ്ദി പുരസ്കാരം ‘റെസ്പെക്ടോ’ എന്ന ചിത്രമൊരുക്കിയ ആല്ബര്ട്ടോ മോണ്ടെറാസ് നേടി.