ഹൈദരാബാദ്: സഹപാഠിയുമായുള്ള പ്രണയബന്ധത്തിന്റെ പേരില് പിതാവ് വിദ്യാര്ഥിനിയെ കൊലപ്പെടുത്തി. ആന്ധ്രാ പ്രദേശിലെ പ്രകാശം ജില്ലയിലാണ് സംഭവം. വൈഷ്ണവി എന്ന ഇരുപതുകാരിയാണു തിങ്കളാഴ്ച കൊല്ലപ്പെട്ടത്. അയല്വാസികളാണ് വീട്ടില് വൈഷ്ണവിയെ കൊല്ലപ്പെട്ട നിലയില് കണ്ടെത്തിയത്. വൈഷ്ണവിയുടെ പിതാവ് വെങ്ക റെഡ്ഡിയെ പോലീസ് കസ്റ്റഡിയിലെടുത്തു.
വൈഷ്ണവി സഹപാഠിയും കീഴ്ജാതിക്കാരനുമായ യുവാവുമായി പ്രണയത്തിലായിരുന്നു. ഇവര് ഒളിച്ചോടി വിവാഹം കഴിക്കുമെന്ന ധാരണയില് യുവാവിനെ കാണാന് പാടില്ലെന്നും പ്രണയബന്ധം അവസാനിപ്പിക്കണമെന്നും വെങ്കയ്യ മകളോട് ആവശ്യപ്പെട്ടിരുന്നു. എന്നാല് വൈഷ്ണവി ഇതില് നിന്നും പിന്മാറാന് തയ്യാറാവത്തതിനെ തുടര്ന്നാണ് കൊലപാതകം നടത്തിയതെന്നാണ് സൂചന.
അതേസമയം ഇതിനെ ചൊല്ലി പെണ്കുട്ടിയും പിതാവും തമ്മില് കഴിഞ്ഞ ദിവസം വാക്കുതര്ക്കം ഉണ്ടായെന്നും പ്രകോപിതനായ വെങ്കയ്യ മകളെ കഴുത്ത് ഞെരിച്ച് കൊലപ്പെടുത്തിയെന്നുമാണ് പോലീസിന്റെ വിശദീകരണം.
പ്രാഥമിക അന്വേഷണത്തില് പെണ്കുട്ടിയുടേത് സാധാരണ മരണ മരണമായാണ് പോലീസ് റിപ്പോര്ട്ട് ചെയ്തത്. എന്നാല് തുടര്ന്നു നടത്തിയ ഫോറന്സിക് പരിശോധനകളില് ഇത് കൊലപാതകമാണെന്ന് തെളിയുകയായിരുന്നു. കൊലപാതകത്തില് പിതാവ് വെങ്കയ്യ കുറ്റ സമ്മതം നടത്തി.