തൃശൂര്: എടപ്പാള് തിയേറ്റര് പീഡന കേസില് തെളിവുകള് നല്കിയ തീയേറ്റര് ഉടമയെ അറസ്റ്റ് ചെയ്ത അന്വേഷണ ഉദ്യോഗസ്ഥന് ഡി.വൈ.എസ്.പി ഷാജി വര്ഗീസിനെ സ്ഥലം മാറ്റി. തൃശൂര് റെഞ്ച് ഐജി എംആര് അജിത്കുമാറാണ് ഡിവൈഎസ്പിക്കെതിരേ നടപടി സ്വീകരിച്ചത്. പൊലീസ് ഹെഡ്ക്വാര്ട്ടേഴ്സിലേക്കാണ് ഷാജിയെ മാറ്റിയത്.
തിയേറ്റര് ഉടമയെ അറസ്റ്റ് ചെയ്ത സംഭവം വന് വിവാദമായിരുന്നു. സംഭവത്തില് മുഖ്യമന്ത്രി പിണറായി വിജയന് കടുത്ത അതൃപ്തിയും രേഖപ്പെടുത്തിയിരുന്നു. മുഖ്യമന്ത്രിയുടെ ആവശ്യപ്രകാരം ഡിജിപി തൃശൂര് റോഞ്ച് ഐജിയോട് റിപ്പോര്ട്ട് ആവശ്യപ്പെട്ടിരുന്നു. ഇതേതുടര്ന്നാണ് ഡിവൈഎസ്പിക്കെതിരേ നടപടി വന്നതും തിയേറ്റര് പീഡനക്കേസിന്റെ അന്വേഷണം ക്രൈംബ്രാഞ്ചിന് കൈമാറിയതും.
തിയറ്റര് ഉടമക്കെതിരെ കേസെടുത്ത സംഭവത്തെക്കുറിച്ച് തനിക്ക് അറിവുണ്ടായിരുന്നില്ലെന്ന് ചൂണ്ടിക്കാട്ടി ഐജി അജിത്കുമാര് ഡിജിപി ലോക്നാഥ് ബെഹ്റക്ക് റിപ്പോര്ട്ട് സമര്പ്പിച്ചിരുന്നു. തീരുമാനമെടുത്തത് അന്വേഷണ ഉദ്യോഗസ്ഥനായ ഡിവൈ.എസ്.പിയാണ്. അറസ്റ്റില് നിയമപരമായ പാളിച്ചയില്ലെന്ന മലപ്പുറം എസ്പിയുടെ വിശദീകരണവും റിപ്പോര്ട്ടിലുണ്ട്. ഐജിയുടെ റിപ്പോര്ട്ട് ഡിജിപി ലോക്നാഥ് ബെഹ്റ നിയമോപദേശത്തിനയച്ചതിന് പിന്നാലെയാണ് കേസ് ചുമതല ക്രൈംബ്രാഞ്ചിന് കൈമാറിയത്.