മുംബൈ: സമാധാനപരമായി പ്രതിഷേധിക്കുന്നവര്‍ രാജ്യദ്രോഹികളോ ദേശവിരുദ്ധരോ അല്ലെന്ന് ബോംബെ ഹൈകോടതി. ബീഡ് ജില്ലയില്‍ പൗരത്വഭേദഗതി നിയമത്തിനെതിരെ അനിശ്ചിതമായി പ്രതിഷേധിക്കാന്‍ അനുമതി നല്‍കിയാണ് കോടതിയുടെ പരാമര്‍ശം.
ബോംബെ ഹൈേകാടതിയുടെ ഒൗറംഗബാദ് ബെഞ്ചാണ് ഇതുമായി ബന്ധപ്പെട്ട ഉത്തരവ് കഴിഞ്ഞ ദിവസം പുറത്തിറക്കിയത്. ജസ്റ്റിസുമാരായ ടി.വി നലവാദെ, എം.ജി സ്വാലിക്കര്‍ എന്നിവരുടെതാണ് ഉത്തരവ്. സി.എ.എ പ്രതിഷേധം തടഞ്ഞുള്ള മജിസ്ട്രേറ്റ് കോടതി ഉത്തരവിനെതിരെ ഇഫ്തിക്കര്‍ ഷെയ്ഖ് എന്നയാള്‍ നല്‍കിയ ഹരജിയാണ് പരിഗണിച്ചത്. ബീഡ് ജില്ലയിലെ പഴയ ലഡാഗ് മൈതാനത്ത് സി.എ.എക്കെതിരെ പ്രതിഷേധിക്കാന്‍ അനുവദിക്കണമെന്നായിരുന്നു ഹരജിയിലെ ആവശ്യം.
ഇത്തരം ആളുകളെ രാജ്യദ്രോഹികളെന്ന് വിളിക്കാനാവില്ല. നിയമത്തിനെതിരായി പ്രവര്‍ത്തക്കുന്നവരാണ് രാജ്യദ്രോഹികള്‍. ബീഡ് ജില്ലയില്‍ സമാധാനപരമായി സി.എ.എക്കെതിരെ പ്രതിഷേധിക്കണമെന്നത് മാത്രമാണ് ഹരജിക്കാരുടെ ആവശ്യമെന്ന് കോടതി വ്യക്തമാക്കി. സി.എ.എ തങ്ങള്‍ക്ക് എതിരാണെന്ന് എതെങ്കിലുമൊരു വിഭാഗത്തിന് തോന്നുകയാണെങ്കില്‍ അതിനെതിരെ അവര്‍ക്ക് പ്രതിഷേധിക്കാനുള്ള അവകാശമുണ്ടെന്നും കോടതി ചൂണ്ടിക്കാട്ടി.
