തിരുവനന്തപുരം: കേരളത്തിലെ സാംസ്‌കാരിക നായകന്മാരെ രൂക്ഷമായ ഭാഷയില്‍ വിമര്‍ശിച്ച് നടനും സംവിധായകനുമായ സന്തോഷ് പണ്ഡിറ്റ് രംഗത്ത്. കേരളത്തിലെ സാംസ്‌കാരിക നായകന്മാര്‍ അഭിപ്രായം പറയുന്നത് നവംബര്‍ ഡിസംബര്‍ മാസങ്ങളില്‍ മാത്രമാണെന്ന് സന്തോഷ് പണ്ഡിറ്റ് പറഞ്ഞു.
ജനുവരിയിലാണ് അവര്‍ക്കുള്ള അവാര്‍ഡ് പ്രഖ്യാപിക്കുന്നത് അതാണ് നവംബര്‍ ഡിസംബര്‍ മാസം തിരഞ്ഞെടുക്കാനുള്ള കാരണമെന്നും സന്തോഷ് പണ്ഡിറ്റ് വ്യക്തമാക്കി. ഒരു സ്വകാര്യ ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
നമ്മുടെ സാംസ്‌കാരിക നായകന്മാരെ കുറിച്ച് ജനങ്ങള്‍ ഒന്ന് പഠിക്കുന്നത് നല്ലതാണ്. അവര്‍ കേരളത്തിലെ കാര്യങ്ങള്‍ക്കൊന്നും അഭിപ്രായം പറയാറില്ല. ഉത്തര്‍പ്രദേശിലെയും ചൈനയിലെയും കാര്യങ്ങള്‍ക്ക് മാത്രമാണ് പറയുക. കേരളത്തിലെ സാംസ്‌കാരിക നായകന്മാര്‍ പക്കാ വേസ്റ്റാണ്. ശരിക്കും അവരെ വെറൊരു പേരിലാണ് വിളിക്കേണ്ടത്. താന്‍ അത് പറയുന്നില്ല.
അവാര്‍ഡും പണവുമാണ് ഇവരുടെ പ്രധാന പ്രശ്‌നം. സിനിമയില്‍ അപാരമായ ചങ്കൂറ്റമൊക്കെ കാണിക്കുന്ന നായകന്മാര്‍ വ്യക്തി ജീവിതത്തില്‍ വെറും സീറോ മാത്രമാണ്. അവരുടെ ആ ചങ്കുറപ്പൊന്നും വ്യക്തി ജീവിതത്തില്‍ കാണിക്കുന്നില്ല പണ്ഡിറ്റ് പറഞ്ഞു.
