പത്തനംതിട്ട: ശബരിമല യുവതി പ്രവേശനവുമായി ബന്ധപ്പെട്ട് ഫേസ്ബുക്ക് പോസ്റ്റിലൂടെ മതവികാരം വ്രണപ്പെടുത്തിയെന്ന കേസില് റിമാന്ഡില് കഴിയുന്ന രഹ്ന ഫാത്തിമയുടെ ജാമ്യാപേക്ഷയില് പത്തനംതിട്ട ചീഫ് ജൂഡീഷ്യല് മജിസ്ട്രേറ്റ് കോടതി ഇന്ന് വിധി പറയും.
ഇന്ത്യന് ശിക്ഷാ നിയമത്തിലെ 295 എ വകുപ്പ് പ്രകാരമാണ് രഹ്ന ഫാത്തിമക്കെതിരെ കേസ്സെടുത്തിരിക്കുന്നത്. ബിജെപി നല്കിയ പരാതിയിലാണ് രഹ്നയെ പോലീസ് അറസ്റ്റ് ചെയ്തത്.
രഹ്ന ഫാത്തിമയെ കസ്റ്റഡിയില് വിട്ടു കിട്ടണമെന്ന പൊലീസിന്റെ ആവശ്യം കോടതി കഴിഞ്ഞ ദിവസം തള്ളിയിരുന്നു. ജയിലില് എത്തി രഹ്നയെ ചോദ്യം ചെയ്യാന് കോടതി അനുമതി നല്കിയിരുന്നു. ഇതിനെ തുടര്ന്ന് പൊലീസ് സംഘം കൊട്ടാരക്കര ജയിലിലെത്തി രഹ്നയെ ചോദ്യം ചെയ്തു. ഫേസ് ബുക്ക് പോസ്റ്റിന് പിന്നില് മറ്റാര്ക്കെങ്കിലും പങ്കുണ്ടോ എന്നടക്കമുള്ള കാര്യങ്ങളാണ് പൊലീസ് അന്വേഷിച്ചത്.
ഫേസ്ബുക്ക് പോസ്റ്റിലൂടെ മതവികാരത്തെ വ്രണപ്പെടുത്തിയെന്ന കേസില് കഴിഞ്ഞ 27 നായിരുന്നു രഹ്ന ഫാത്തിമ റിമാന്ഡിലായത്. അറസ്റ്റിന് പിന്നാലെ ബിഎസ്എന്എല് ജീവനക്കാരിയായ രഹ്നയെ അന്വേഷണ വിധേയമായി സസ്പെന്റ് ചെയ്തിരുന്നു.