മലപ്പുറം: സര്ക്കാര് പരിപാടിയില് ചെഗുവേരയുടെ ചിത്രമുള്ള പതാകയുമായി വന്ന പ്രവര്ത്തകരെ ശാസിച്ച് മുഖ്യമന്ത്രി പിണറായി വിജയന്.
പരപ്പനങ്ങാടി ഹാര്ബറിന്റെ ശിലാ സ്ഥാപനം നിര്വഹിച്ച് സംസാരിക്കുന്നതിനിടെ കൊടി ഉയര്ത്തിയപ്പോഴാണ് മുഖ്യമന്ത്രി പ്രവര്ത്തകരെ താക്കീത് ചെയ്തത്. ഏതു സര്ക്കാര് വന്നാലും അത് എല്ലാവരുടേതുമാണ്. പല ആശയങ്ങള് ഉണ്ടാവാം എന്നാല് ഈ ആശയങ്ങള് പ്രകടിപ്പിക്കാനുള്ള വേദിയായി പൊതുവേദികള് മാറ്റരുതെന്ന് അദ്ദേഹം വ്യക്തമാക്കി.
എല്ഡിഎഫ് ജയിച്ചാല് അത് എല്ഡിഎഫിന്റെ മാത്രം സര്ക്കാരല്ല നാടിന്റെ മൊത്തം സര്ക്കാരാണ്. ഒരു പതാക പിന്നില് ഉയരുന്നതായി കണ്ടു. നാട്ടില് ഒരുപാട് ആളുകള് അംഗീകരിക്കുകയും ആദരിക്കുകയും ചെയ്യുന്ന ഒരാളുടെ ഫോട്ടോയോട് കൂടിയാണത് . വേറെ ഒരു വേദിയില് അത് ഉയര്ത്തുന്നതില് തെറ്റില്ല. പക്ഷെ അതിന്റെ സ്ഥലമല്ല ഇത്.
അതിന്റെ ആളുകള് മനസിലാക്കേണ്ടത്, എല്ലായിടേയും ഇത് ചുമന്ന് കൊണ്ട് പോകേണ്ട കാര്യമില്ല . അതിന് വേദികള് വേറെ ഉണ്ട് , അവിടങ്ങളില് ഈ കൊടി ആവേശപൂര്വ്വം കൊണ്ടുപോകാവുന്നതാണെന്നാണ് മുഖ്യമന്ത്രി വ്യക്തമാക്കിയത്.