കാസര്‍ഗോഡ്: പെരിയ കല്യോട്ട് കൊല്ലപ്പെട്ട കൃപേഷിന്‍റെയും ശരത് ലാലിന്‍റെയും വീടുകള്‍ മുഖ്യമന്ത്രി പിണറായി വിജയന്‍ സന്ദര്‍ശിക്കില്ല.
ഇരുവരുടെയും വീടുകള്‍ മുഖ്യമന്ത്രി സന്ദര്‍ശിച്ചേക്കുമെന്ന് നേരത്തെ വിവരങ്ങള്‍ ഉണ്ടായിരുന്നു. ഇരു വീടുകളും സന്ദര്‍ശിക്കാന്‍ മുഖ്യമന്ത്രി താത്പര്യം പ്രകടിപ്പിച്ചതിനെ തുടര്‍ന്ന് സിപിഎം ജില്ലാ നേതൃത്വം കാസര്‍ഗോഡ് ഡിസിസിയുമായി ബന്ധപ്പെടുകയും ചെയ്തിരുന്നു.
എന്നാല്‍, നിലവിലെ സാഹചര്യത്തില്‍ മുഖ്യമന്ത്രി ഇവിടങ്ങളില്‍ സന്ദര്‍ശനം നടത്തിയാല്‍ പ്രാദേശിക പ്രതിഷേധങ്ങള്‍ ഉണ്ടായേക്കുമെന്ന് പോലീസ് മുന്നറിയിപ്പ് നല്‍കി. ഇത് പരിഗണിച്ചാണ് സന്ദര്‍ശന നീക്കം ഉപേക്ഷിച്ചതെന്നാണ് വിവരം.
മുഖ്യമന്ത്രി വീട്ടിലെത്തുന്നതിനെ കുറിച്ച്‌ കൊല്ലപ്പെട്ടവരുടെ കുടുംബാംഗങ്ങളുടെ അഭിപ്രായം എന്താണെന്നും, മുഖ്യമന്ത്രി വന്നാല്‍ ക്രമസമാധാന പ്രശ്നങ്ങളുണ്ടാവുമോ എന്നുമായിരുന്നു നേരത്തെ സിപിഎം ജില്ലാ നേതൃത്വം കോണ്‍ഗ്രസ് നേതാക്കളോട് ആരാഞ്ഞത്.
പാര്‍ട്ടി കാസര്‍ഗോഡ് ജില്ലാ കമ്മിറ്റി ഓഫീസ് ശിലാസ്ഥാപനം, കാസര്‍ഗോഡ് അലാം ബസ് സ്റ്റാന്‍ഡിന്‍റെ ഉദ്ഘാടനം എന്നീ പൊതുപരിപാടികളില്‍ പങ്കെടുക്കാനായാണ് മുഖ്യമന്ത്രി വെള്ളിയാഴ്ച ജില്ലയില്‍ എത്തിയിട്ടുള്ളത്. മുഖ്യമന്ത്രി പങ്കെടുക്കുന്ന പരിപാടികള്‍ക്കും അദ്ദേഹത്തിന്‍റെ വാഹനവ്യൂഹം കടന്നു പോകുന്ന വഴികളിലും കനത്ത സുരക്ഷയാണ് ഒരുക്കിയിരിക്കുന്നത്.
