കോട്ടയം: അന്ത്യ അത്താഴത്തിന്‍റെ ഓര്‍മ്മകളുമായി ക്രൈസ്തവര്‍ ഇന്ന് പെസഹാ വ്യാഴം ആഘോഷിക്കുന്നു. വലിയ നോയന്പിന്‍റെ സുപ്രധാന തിരുകര്‍മങ്ങള്‍ക്ക് ദേവാലയങ്ങളും ഭവനങ്ങളും ഒരുങ്ങി. ക്രിസ്തു ശിഷ്യരുടെ പാദങ്ങള്‍ കഴുകിയതിന്‍റെയും അന്ത്യ അത്താഴവേളയില്‍ വിശുദ്ധ കുര്‍ബാന സ്ഥാപിച്ചതിന്‍റെയും അനുസ്മരണം ഇന്നു ദേവാലയങ്ങളില്‍ നടക്കും.
വൈദികര്‍ പ്രത്യേക പ്രാര്‍ഥനാ ശുശ്രൂഷകള്‍ക്കിടെ 12 പേരുടെ പാദങ്ങള്‍ കഴുകി ചുംബിച്ച്‌ എളിമയുടെ അടയാളമായി ക്രിസ്തു നടത്തിയ പാദക്ഷാളനത്തെ അനുസ്മരിക്കും. ഇന്നു വൈകുന്നേരംവരെ ദേവാലയങ്ങളില്‍ ആരാധനയും പീഢാനുഭവ അനുസ്മരണത്തിന് ഒരുക്കമായുള്ള പ്രാര്‍ഥനകളും നടത്തും.
സെഹിയോന്‍ ഉൗട്ടുശാലയില്‍ ആ സായാഹ്നത്തില്‍ ക്രിസ്തുവും 12 ശിഷ്യന്‍മാരും നടത്തിയ അവിസ്മരണീയമായ പെസഹ ആചരണത്തെ അനുസ്മരിച്ച്‌ ഇന്നു വെകുന്നേരം ക്രൈസ്തവ ഭവനങ്ങളില്‍ പെസഹ ഭക്ഷണം അഥവാ കുരിശപ്പം തയാറാക്കും. രാത്രി വൈകും വരെ പാന ആലാപനം നടത്തിയും ക്രിസ്തുവിന്‍റെ പീഡാനുഭവത്തെ അനുസ്മരിക്കുന്ന സുവിശേഷങ്ങള്‍ വായിച്ചും വിശ്വാസികള്‍ ആത്മീയമായി ഒരുങ്ങിയശേഷമാണ് പെസഹ ഭക്ഷണം.
പ്രാര്‍ഥനാനിര്‍ഭരരായി കുടുംബങ്ങള്‍ ഒരുമയോടെ തയാറാക്കുന്ന പെസഹ അപ്പം മുതിര്‍ന്ന അംഗം പ്രാര്‍ഥിച്ചശേഷം മുറിച്ച്‌ പങ്കുവയ്ക്കും. ഇതിനൊപ്പം അടയും കുരുത്തോലയിട്ടു തയാറാക്കുന്ന പാലും ഭക്ഷിക്കും. നാളെ ദേവാലയങ്ങളില്‍ ദുഃഖവെള്ളി തിരുകര്‍മങ്ങളും പീഡാനുഭവ വായനയും കുരശിന്‍റെ വഴി പ്രാര്‍ഥനകളും നടത്തും.
