കണ്ണൂര് : പയ്യാവൂര് പാറക്കടവില് വീടിനകത്ത് മരിച്ച നിലയില് കണ്ടെത്തിയ തോണിപ്പാറയില് ബാബുവിന്റെ (52) മരണം കൊലപാതകമെന്ന് പോസ്റ്റ്മോര്ട്ടം റിപ്പോര്ട്ട്. ഉറക്കത്തില് തോര്ത്തോ, കയറോ ഉപയോഗിച്ച് കഴുത്ത് മുറുക്കിയാണ് കൊലപ്പെടുത്തിയതെന്നാണ് റിപ്പോര്ട്ടിലുള്ളത്
ടാപ്പിംഗ് തൊഴിലാളിയായിരുന്ന ബാബു കഴിഞ്ഞ രണ്ടാഴ്ചയായി പയ്യാവൂര് ടൗണിലെ ചിക്കന് സ്റ്റാളില് തൊഴിലാളിയായി ജോലി ചെയ്യുകയായിരുന്നു. ഇന്നലെ രാവിലെയാണ് അദ്ദേഹത്തെ വീടിനകത്ത് കട്ടിലില് മരിച്ച നിലയില് കണ്ടെത്തിയത്. ഭാര്യ ജാന്സി വിവരമറിയിച്ചതിനെ തുടര്ന്ന് നാട്ടുകാര് സ്ഥലത്തെത്തുകയായിരുന്നു. കമിഴ്ന്നുകിടന്ന നിലയിലായിരുന്നു മൃതദേഹമുണ്ടായിരുന്നത്. നാവ് കടിച്ച നിലയില് പുറത്തേക്ക് തള്ളിയ നിലയിലായിരുന്നു. കഴുത്തില് മുറിവേറ്റതിന്റെ പാടുമുണ്ട്.
ഹൃദയാഘാതത്തെ തുടര്ന്നാണ് മരണമെന്നായിരുന്നു പ്രാഥമിക നിഗമനം. എന്നാല് പതിവായി വീട്ടില് വഴക്ക് നടക്കാറുള്ളതായി നാട്ടുകാര് അറിയിച്ചതോടെ അസ്വാഭാവിക മരണത്തിന് കേസെടുത്ത് പോലീസ് ഉച്ചയോടെ മൃതദേഹം പോസ്റ്റ്മോര്ട്ടത്തിന് വിടുകയായിരുന്നു. സംഭവവുമായി ബന്ധപ്പെട്ട് ഭാര്യ ജാന്സിയെയും വെമ്പുവ സ്വദേശിയായ യുവാവിനെയും പോലീസ് കസ്റ്റഡിയിലെടുത്തു. ഇരുവരെയും വിശദമായി ചോദ്യം ചെയ്തുവരികയാണ്.