കോട്ടയം: കന്യാസ്ത്രീയെ പീഡിപ്പിച്ച കേസില് അറസ്റ്റിലായ ബിഷപ് ഫ്രാങ്കോ മുളയ്ക്കലിനെ പാലാ കോടതിയില് എത്തിച്ചു. ബിഷപ്പിനെ മൂന്നു ദിവസത്തെ കസ്റ്റഡിയില് വേണമെന്ന് പൊലീസ് ആവശ്യപ്പെട്ടു. ഇത് പ്രതിഭാഗം എതിര്ക്കുകയും രക്തവും ഉമിനീരും ബലം പ്രയോഗിച്ച് എടുത്തുവെന്ന് ബിഷപ്പ് കോടതിയില് പരാതി നല്കുകയും ചെയ്തു.
അറസ്റ്റിലായ ശേഷം ബിഷപ്പിന് ആരോഗ്യപ്രശ്നങ്ങളുണ്ടായതിനെ തുടര്ന്ന് കഴിഞ്ഞ ദിവസം ആശുപത്രിയില് പ്രവേശിപ്പിച്ചിരുന്നു. എന്നാല് ആരോഗ്യസ്ഥിതിയില് പുരോഗതിയുണ്ടായതിനെ തുടര്ന്ന് ബിഷപ്പിനെ ആശുപത്രിയില് നിന്ന് ഡിസ്ചാര്ജ് ചെയ്തു.
ഹൃദയാഘാത സാധ്യത പരിശോധിക്കുന്ന ട്രോപ് ഐ ടെസ്റ്റ് രണ്ടു തവണ നടത്തിയിരുന്നു. ഇന്നലെ രാത്രി തൃപ്പൂണിത്തുറ താലൂക്ക് ആശുപത്രിയില് വച്ച് മുളയ്ക്കലിന്റെ രക്തസമ്മര്ദം 200 രേഖപ്പെടുത്തുകയും ഇ.സി.ജിയില് വ്യതിയാനം കണ്ടെത്തുകയും ചെയ്തതിനെ തുടര്ന്നാണ് കോട്ടയം മെഡിക്കല് കോളേജിലേക്ക് മാറ്റിയത്.
അതേസമയം ബിഷപ്പിന്റെ ജാമ്യാപേക്ഷ ഇന്ന് കോടതിയില് ഹാജരാക്കാനാണ് അഭിഭാഷകരുടെ തീരുമാനം. എന്നാല് ഫ്രാങ്കോയെ മൂന്ന് ദിവസത്ത കസ്റ്റഡിയില് കിട്ടാന് പൊലീസ് കോടതിയില് അപേക്ഷ നല്കും. കൂടുതല് ചോദ്യം ചെയ്യുന്നതിനും കുറവിലങ്ങാട് മഠത്തിലടക്കം തെളിവെടുപ്പ് നടത്തുന്നതിനുമാണ് ഫ്രാങ്കോയെ കസ്റ്റഡിയില് ആവശ്യപ്പെടുക.
