ന്യൂഡല്ഹി: 360 ഡിഗ്രി പനോരമിക് വ്യൂവില് ഇന്ത്യന് നഗരങ്ങളും വിനോദസഞ്ചാര കേന്ദ്രങ്ങളും നദികളും മലകളും കാണുന്നതിനുള്ള ഗൂഗിളിന്റെ പുതിയ പദ്ധതിക്ക് കേന്ദ്രസര്ക്കാര് അനുമതിയില്ല. പദ്ധതിക്ക് അനുമതി നിഷേധിച്ച വിവരം കേന്ദ്രസര്ക്കാര് ലോക്സഭയെ അറിയിച്ചു.
2015ലാണ് പദ്ധതിക്ക് അനുമതി ഗൂഗിള്കേന്ദ്രസര്ക്കാറിനെ സമീപിച്ചത്. എന്നാല് പുതിയ സംവിധാനത്തിന് അനുമതി നല്കാനാവില്ലെന്ന് കേന്ദ്രമന്ത്രി ഹന്സരാജ് ഗംഗാരം അഹിര് ഗൂഗ്ളിനെ അറിയിക്കുകയായിരുന്നു.
360 ഡിഗ്രി പനോരമിക് വ്യൂവില് നഗരങ്ങളിലെ തെരുവകളുള്പ്പടെ കാണുന്നതിനുള്ള സംവിധാനമാണ് സ്ട്രീറ്റ് വ്യൂ ആപില് ഗൂഗ്ള് ഒരുക്കുന്നത്. 3ഡി ചിത്രങ്ങള് ഗൂഗ്ള് സ്ട്രീറ്റ് വ്യൂവിന്റെ ഭാഗമാണ്. യു.എസ്, കാനഡ, യുറോപ്യന് രാജ്യങ്ങള് എന്നിവടങ്ങളിലെല്ലാം സ്ട്രീറ്റ് വ്യൂവിന് അനുമതിയുണ്ട്.
താജ്മഹല്, ചുവപ്പ് കോട്ട, കുത്തബ്മിനാര്, വാരണാസി, നളന്ദ യൂനിവേഴ്സിറ്റി, മൈസൂര് കൊട്ടാരം, തഞ്ചാവൂര് ക്ഷേത്രം, ചിന്നസ്വാമി സ്റ്റേഡിയം എന്നിവടങ്ങളില് പരീക്ഷണാടിസ്ഥാനത്തില് ഗൂഗ്ള് സ്ട്രീറ്റ് വ്യു ആരംഭിച്ചിരുന്നു. ആര്ക്കിയോളജി വകുപ്പുമായി ചേര്ന്നായിരുന്നു പദ്ധതി.