തൃശൂര്: തിരുവല്ലയില് യുവാവ് പെണ്കുട്ടിയെ തീകൊളുത്തി കൊലപ്പെടുത്തിയ സംഭവത്തിന്റെ ഞെട്ടല് മാറും മുമ്പ് സംസ്ഥാനത്ത് സമാനരീതിയില് മറ്റൊരു കൊലപാതകവും കൂടി നടന്നിരിക്കുന്നു. തൃശൂര് ചിയാരത്ത് പ്രണയാഭ്യര്ഥന നിരസിച്ചതിന് യുവാവ് ഇരുപത്തിരണ്ടുകാരിയെ തീകൊളുത്തിക്കൊന്നു.
എന്ജിനീയറിംഗ് വിദ്യാര്ഥിയായ ചിയാരം സ്വദേശിനി നീതുവാണ് കൊല്ലപ്പെട്ടത്. സംഭവശേഷം ഇവിടെനിന്നും രക്ഷപ്പെടാന് ശ്രമിച്ച വടക്കേക്കാട് സ്വദേശിയായ ജിതീഷിനെ നാട്ടുകാര് പിടികൂടി പോലീസില് ഏല്പ്പിച്ചു. വ്യാഴാഴ്ച രാവിലെ ഏഴോടെയാണ് സംഭവമുണ്ടായത്.
വീട്ടിലേക്ക് കയറി വന്ന ജിതീഷ് പെണ്കുട്ടിയുടെ കഴുത്തില് കത്തികൊണ്ട് കുത്തിപ്പരിക്കേല്പ്പിച്ചശേഷം കൈയില് കരുതിയ പെട്രോള് ഒഴിച്ച് തീ കൊളുത്തുകയുമായിരുന്നു. ജിതീഷ് ഏറെ നാളായി പെണ്കുട്ടിയുടെ പിന്നാലെ നടന്ന് ശല്യപ്പെടുത്തുന്നുണ്ടായിരുന്നുവെന്ന് ബന്ധുക്കള് പറഞ്ഞു.