അഹമ്മദാബാദ്: ലോകത്തിലെ വിവിധ ഭാഗങ്ങളില് അപകടത്തില്പ്പെട്ട ക്രിസ്ത്യാനികള് അടക്കം വ്യത്യസ്ത മതവിഭാഗങ്ങളില്പ്പെട്ടവരെ സഹായിച്ചതിനു കാരണം രാജ്യസ്നേഹമാണെന്ന് പ്രധാനമന്ത്രി നരേന്ദ്ര മോദി. അഹമ്മദാബാദില് നടന്ന പൊതു പരിപാടിയില്, ഗാന്ധിനഗര് ആര്ച്ച് ബിഷപ്പ് തോമസ് മക്വാന് പുറത്തിറക്കിയ ഇടയലേഖനത്തെ സൂചിപ്പിച്ചുകൊണ്ടാണ് പ്രധാനമന്ത്രി ഇക്കാര്യം പറഞ്ഞത്.
മതപരമായ സ്ഥാനം വഹിക്കുന്ന ഒരാള് ഇത്തരമൊരു പ്രസ്താവന പുറത്തിറക്കിയത് ഞെട്ടലുണ്ടാക്കുന്ന കാര്യമാണ്. ‘രാഷ്ട്രഭക്തി’ തന്നെയാണ് എല്ലാ ഇന്ത്യക്കാരെയും സഹായിക്കുന്നതിന് തനിക്ക് വഴികാട്ടിയിട്ടുള്ളത്. കേരളത്തില്നിന്നുള്ള, മിക്കവാറും ക്രിസ്ത്യാനികളായ നഴ്സുമാരെ ഇറാഖിലെ തീവ്രവാദികളില്നിന്ന് രക്ഷപ്പെടുത്തിയത് മതം നോക്കിയല്ല.
കേരളത്തില്നിന്നുള്ള പുരോഹിതന് ടോം ഉഴുന്നാലിനെ യമനില്നിന്ന് മോചിപ്പിക്കുന്നതിനുള്ള നടപടികള് സ്വീകരിച്ചതും അദ്ദേഹം ഇന്ത്യയുടെ പുത്രനായതുകൊണ്ടാണ്, മോദി പറഞ്ഞു. അഫ്ഗാനിസ്ഥാനിലെ തീവ്രവാദികളില്നിന്ന് ഫാദര് അലക്സിസ് പ്രേംകുമാര്, ജൂഡിത്ത് ഡിസൂസ എന്നിവരെ രക്ഷപ്പെടുത്തിയതും അദ്ദേഹം ചൂണ്ടിക്കാട്ടി. ദേശീയതയുടെ മൂല്യങ്ങളെ എതിര്ക്കുന്നത് ഗൗരവമായ വിഷയമാണെന്നും മോദി പറഞ്ഞു.
