തളിപ്പറമ്പ്: കാമുകനെ വെട്ടിനുറുക്കി സ്യൂട്ട്കെയ്സിലാക്കിയ സംഭവത്തില് അറസ്റ്റിലാവുകയും ജാമ്യത്തിലിറങ്ങി മുങ്ങുകയും ചെയ്ത പയ്യന്നൂര് സ്വദേശിയായ ഡോ. ഓമന മലേഷ്യയില് മരിച്ചതായി സൂചന. കഴിഞ്ഞ ദിവസങ്ങളിലാണ് മലയാളം അറിയാവുന്ന സ്ത്രീയെ മലേഷ്യയില് കെട്ടിടത്തില്നിന്ന് വീണ് മരിച്ച നിലയില് കണ്ടെത്തിയതായി പത്രങ്ങളില് പരസ്യം വന്നത്.
ബന്ധുക്കള് തളിപ്പറമ്പ് ഡിവൈഎസ്പി ഓഫീസുമായി ബന്ധപ്പെട്ട് സംശയം അറിയിക്കുകയും ഡിവൈഎസ്പി കെ.വി. വേണുഗോപാല് മലേഷ്യന് പോലീസുമായി ബന്ധപ്പെട്ട് വീട്ടുകാര് പറഞ്ഞ അടയാളങ്ങള് ശരിയാണെന്ന് കണ്ടെത്തുകയുമായിരുന്നു. ഇനി മരിച്ചത് ഓമനയാണെന്ന് സ്ഥിരീകരിക്കാന് ഡിഎന്എ ടെസ്റ്റ് നടത്തണം. ഇതിനായി ബന്ധുക്കള് മലേഷ്യയിലേക്ക് പോകുവാനുള്ള തയാറെടുപ്പിലാണ്.
1996 ജൂലൈ 11-നാണ് ഓമന പ്രതിയായ കേസിനാസ്പദമായ സംഭവം നടന്നത്. മറ്റൊരു സ്ത്രീയുമായി ബന്ധം സ്ഥാപിച്ച കാമുകനും പയ്യന്നൂരിലെ കരാറുകാരനുമായ മുരളീധരനെ ഊട്ടിയിലെ ലോഡ്ജില് വിളിച്ചുവരുത്തി കൊലപ്പെടുത്തുകയായിരുന്നു. തുടര്ന്ന് മൃതദേഹം വെട്ടിമുറിച്ച് സ്യൂട്ട്കെയ്സിലാക്കി. ആന്തരികാവയവങ്ങള് ചെറുകഷ്ണങ്ങളാക്കി മുറിയിലെ ടോയ്ലറ്റില്തന്നെ ഫ്ളഷ് ചെയ്തു. മൃതദേഹം ഉപേക്ഷിക്കാന് ഊട്ടിയില്നിന്ന് കൊടൈക്കനാലിലേക്ക് കാറില് പോകവേ പെട്ടിയില്നിന്ന് ദുര്ഗന്ധം അനുഭവപ്പെട്ട ഡ്രൈവര് വിവരം പോലീസില് അറിയിക്കുകയും അറസ്റ്റിലാവുകയുമായിരുന്നു.
1998-ല് ജീവപര്യന്തം തടവ് ലഭിച്ച ഓമന 2001-ല് പരോളിലിറങ്ങിയ ശേഷം തിരിച്ചു ജയിലില് എത്തിയില്ല. ഇന്റര്പോള് ഡോ. ഓമനയെ പിടികിട്ടാപുള്ളിയായി പ്രഖ്യാപിക്കുകയും ചെയ്തു. 16 വര്ഷങ്ങളായി ഡോ. ഓമനയെ കുറിച്ച് വിവരങ്ങളൊന്നും ഉണ്ടായിരുന്നില്ല.