പുനലൂര്‍: കോട്ടയം മാന്നാനത്ത് ഭാര്യാ വീട്ടുകാര്‍ തട്ടിക്കൊണ്ടു പോയ നവവരന്‍ കൊല്ലപ്പെട്ട നിലയില്‍. കോട്ടയം നട്ടാശ്ശേരി എസ്.എച്ച്‌ മൗണ്ട് ചവിട്ടുവരി പ്ലാത്തറ രാജുവി മകന്‍ കെവിന്‍റെ (24) മൃതദേഹമാണ് കണ്ടെത്തിയത്. ഇന്ന് പുലര്‍ച്ചെയാണ് പുനലൂര്‍ ചാലിയേക്കരയില്‍ നിന്ന്‍ മൃതദേഹം കണ്ടെത്തിയത്. ശരീരത്തില്‍ മുറിവേറ്റ പാടുകളുണ്ട്.
പ്രണയിച്ചു വിവാഹം കഴിച്ച കെവിനെ പെണ്‍കുട്ടിയുടെ ബന്ധുക്കളാണ് തട്ടിക്കൊണ്ടുപോയത്. കഴിഞ്ഞ വെള്ളിയാഴ്ചയാണ് ഏറ്റുമാനൂര്‍ രജിസ്ട്രാര്‍ ഓഫിസില്‍ കെവിനും കൊല്ലം തെന്മല സ്വദേശിയായ നീനുവും വിവാഹിതരായത്. ശനിയാഴ്ച പുലര്‍ച്ച 1.30ഒാടെ കെവിന്‍റെ പിതൃസഹോദരിയുടെ മകന്‍ മാന്നാനം സ്വദേശി അനീഷ് സെബാസ്റ്റ്യന്‍റെ വീട്ടിലെത്തിയ ഗുണ്ടസംഘം വീട് അടിച്ചു തകര്‍ക്കുകയായിരുന്നു. ഇൗ സമയം കെവിനും അനീഷും മാത്രമാണ് വീട്ടിലുണ്ടായിരുന്നത്.
വീടിന്‍റെ അടുക്കള അടിച്ചുതകര്‍ത്ത് അഞ്ചുപേര്‍ വീട്ടില്‍ കയറി, വടിവാളും ഇരുമ്പ് വടിയും ഉപയോഗിച്ച്‌ ടി.വി, ഫ്രിഡ്ജ് തുടങ്ങിയ സാധനങ്ങള്‍ മുഴുവന്‍ തകര്‍ത്ത ശേഷം ഇരുവരേയും ക്രൂരമായി മര്‍ദിച്ചു. തുടര്‍ന്ന് സംഘം വന്ന മൂന്ന് കാറുകളിലൊന്നില്‍ കയറ്റിക്കൊണ്ടു പോവുകയായിരുന്നു. രാവിലെ 11ഒാടെ പുനലൂര്‍ ഭാഗത്ത് അനീഷിനെ ഇറക്കിവിടുകയായിരുന്നു.
അതേസമയം പെണ്കുട്ടിയെ കാണാനില്ലെന്നു കാട്ടി ബന്ധുക്കള്‍ പത്തനാപുരം പോലീസ് സ്റ്റേഷനില്‍ പരാതി നല്‍കിയിട്ടുണ്ട്. ഇതിന്‍റെ അടിസ്ഥാനത്തില്‍ ഗാന്ധിനഗര്‍ പോലീസ് പെണ്കുട്ടിയെ സ്റ്റേഷനിലെത്തിച്ച ശേഷം ആശുപത്രിയില്‍ വൈദ്യപരിശോധനയ്ക്കു വിധേയയാക്കി.
സംഭവത്തില്‍ പോലീസ് മനപൂര്‍വം അന്വേഷണം വൈകിപ്പിച്ചെന്നും കെവിന്‍റെ ബന്ധുക്കളും ഭാര്യയും ആരോപിച്ചിരുന്നു. പരാതി നല്‍കിയിട്ടും ആദ്യഘട്ടത്തില്‍ എസ് ഐ കേസെടുക്കാന്‍ തയ്യാറായില്ലെങ്കിലും ഉന്നത പോലീസ് ഉദ്യോഗസ്ഥര്‍ ഇടപെട്ടതോടെ് അന്വേഷണം ഊര്‍ജിതമാക്കുകയായിരുന്നുവെന്ന് കെവിന്‍റെ അച്ഛന്‍ സാജന്‍ പറഞ്ഞു.
