കണ്ണൂര്‍: മുഖ്യമന്ത്രിയ്ക്ക് നേരെ ഫോണിലൂടെ വധഭീഷണി മുഴക്കിയ യുവാവ് പിടിയില്‍. മുഖ്യമന്ത്രി പിണറായി വിജയനെ വധിക്കുമെന്നും സിപിഎം കണ്ണൂര്‍ ജില്ലാ സെക്രട്ടറി പി. ജയരാജന്‍റെ കൈവെട്ടുമെന്നും ഫോണിലൂടെ ഭീഷണിപ്പെടുത്തിയ യുവാവ് ആണ് പിടിയിലായത്.
ചെറുതാഴം മണ്ടൂര്‍ സ്വദേശി വിജേഷി (35) നെയാണ് കണ്ണൂര്‍ ടൗണ്‍ എസ്‌ഐ ശ്രീജിത്തും സംഘവും കോഴിക്കോട് കൊളത്തൂരില്‍ വച്ച്‌ അറസ്റ്റ് ചെയ്തത്. കഴിഞ്ഞ മൂന്നു മാസങ്ങളായി സിപിഎം കണ്ണൂര്‍ ജില്ലാ കമ്മിറ്റി ഓഫീസിലെ ലാന്‍ഡ് ഫോണിലേക്ക് വിളിച്ചാണ് യുവാവ് ഭീഷണി മുഴക്കിക്കൊണ്ടിരുന്നത്.
നിരവധി തവണ ഭീഷണി ഫോണ്‍ കോളുകള്‍ വന്നതിനെ തുടര്‍ന്ന് സിപിഎം ജില്ലാ സെക്രട്ടറി പി. ജയരാജന്‍ കണ്ണൂര്‍ ടൗണ്‍ പോലീസില്‍ പരാതി നല്‍കുകയായിരുന്നു.
