താന്‍ വീണ്ടും അധികാരത്തില്‍ വന്നാല്‍ സംസ്ഥാനത്ത് മദ്യനിരോധനം നടപ്പിലാക്കുമെന്ന് തമിഴ്‌നാട് മുഖ്യമന്ത്രി ജെ. ജയലളിത.ഘട്ടം ഘട്ടമായി പൂര്‍ണ്ണ മദ്യനിരോധനം നടത്തുവാനാണ് പാര്‍ട്ടിയുടെ നയമെന്നും ജയലളിത വ്യക്തമാക്കി.
ചെന്നൈയിലെ തിരഞ്ഞെടുപ്പ് പ്രചരണത്തിന് തുടക്കം കുറിച്ച് കൊണ്ട് സംസാരിക്കുകയായിരുന്നു അവര്‍. ചെന്നൈയില്‍ ആര്‍.കെ.നഗര്‍ നിയോജകമണ്ഡലത്തില്‍ നിന്നാണ് ജയലളിത മത്സരിക്കുന്നത്.
തമിഴ്‌നാട്ടില്‍ മദ്യഉപഭോഗം കുത്തനെ കൂടിയത് കരുണാനിധി സര്‍ക്കാരിന്‍റെ ഭരണകാലത്താണ്. ആ കരുണാനിധിയാണ് ഇപ്പോള്‍ സംസ്ഥാനത്ത് മദ്യനിരോധനം ആവശ്യപ്പെടുന്നതെന്ന് ജയലളിത വിമര്‍ശിച്ചു.
അഞ്ച് വര്‍ഷത്തെ എ.ഐ.ഡി.എം.കെ ഭരണത്തില്‍ തമിഴ്‌നാട് വന്‍കുതിപ്പ് നടത്തിയെന്ന് അവകാശപ്പെട്ട ജയലളിത ജനങ്ങള്‍ക്ക് വേണ്ടിയാണ് താന്‍ ജീവിക്കുന്നതെന്നും പറഞ്ഞു.
