ചെന്നൈ: കോണ്‍ഗ്രസ് മാനസിക വളര്‍ച്ച മുരടിച്ച പാര്‍ട്ടിയാണെന്ന പ്രസ്താവനയില്‍ മാപ്പുപറഞ്ഞ് ഖുശ്ബു സുന്ദര്‍. കോണ്‍ഗ്രസ് വിട്ട് ബി.ജെ.പിയില്‍ ചേര്‍ന്ന നടി ചെന്നൈയില്‍ തിരിച്ചെത്തിയ ശേഷം പ്രതികരിക്കവേയാണ് വിവാദ പരാമര്‍ശം നടത്തിയത്.
പ്രസ്താവന മാനസിക വളര്‍ച്ചയില്ലാത്ത ഭിന്നശേഷി വിഭാഗത്തില്‍പെട്ടവരെ അധിക്ഷേപിക്കുന്നതാണെന്ന് ചൂണ്ടിക്കാട്ടി തമിഴ്നാട്ടിലെ 30ഓളം പൊലീസ് സ്റ്റേഷനുകളില്‍ പരാതി ലഭിച്ചിരുന്നു. ഇതിന് പിന്നാലെയാണ് മാപ്പുമായി ഖുശ്ബു എത്തിയത്.
തിടുക്കത്തിലുള്ള പ്രതികരണത്തിനിടയില്‍ സംഭവിച്ച പ്രസ്താവനയില്‍ മാപ്പുപറഞ്ഞ ഖുശ്ബു ഇനി ആവര്‍ത്തിക്കില്ലെന്നും പ്രസ്താവിച്ചു.
”ഞാന്‍ കോണ്‍ഗ്രസില്‍ ആറ് വര്‍ഷക്കാലം ഉണ്ടായിരുന്നു. ഞാന്‍ പാര്‍ട്ടിക്ക് വേണ്ടി കഠിനാധ്വാനം ചെയ്തു. ഞാന്‍ മാനസിക വളര്‍ച്ച മുരടിച്ച പാര്‍ട്ടിലാണ് ഉണ്ടായിരുന്നതെന്ന് പാര്‍ട്ടി വിട്ട ശേഷം എനിക്ക് മനസിലായി.” -ഖുശ്ബു ചൊവ്വാഴ്ച പ്രതികരിച്ചത് ഇങ്ങനെയായിരുന്നു.
ഖുശ്ബു പാര്‍ട്ടി വിട്ടപ്പോള്‍ തമിഴ്നാട് കോണ്‍ഗ്രസ് അധ്യക്ഷന്‍ കെ.എസ്. അളഗിരി നടത്തിയ പ്രസ്താവനയോട് പ്രതികരിക്കുകയായിരുന്നു അവര്‍. ഖുശ്ബു കോണ്‍ഗ്രസിെന്‍റ നയപരിപാടികളോട് യോജിച്ച്‌ പ്രവര്‍ത്തിച്ചിരുന്നില്ലെന്നും അവര്‍ പോയതില്‍ പാര്‍ട്ടിക്ക് ഒരു നഷ്ടവുമില്ലെന്നുമായിരുന്നു അളഗിരി പറഞ്ഞത്. ബി.ജെ.പിയില്‍നിന്ന് ആരും ഖുശ്ബുവിനെ വിളിച്ചിട്ടില്ലെന്നും അവര്‍ സ്വന്തം ഇഷ്ടപ്രകാരമാണ് അങ്ങോട്ട് പോയതെന്നും അദ്ദേഹം പറഞ്ഞിരുന്നു.
