ന്യൂഡല്ഹി: മുന് വിജിലന്സ് ഡയറക്ടര് ജേക്കബ് തോമസിനെതിരായ കോടതിയലക്ഷ്യ നടപടി സുപ്രീംകോടതി സ്റ്റേ ചെയ്തു. ജേക്കബ് തോമസ് നടത്തിയത് ജഡ്ജിമാര്ക്ക് എതിരെയുളള വിമര്ശനമല്ലെന്ന് നിരീക്ഷിച്ചായിരുന്നു സുപ്രീംകോടതി നടപടി. സംവിധാനം മെച്ചപ്പെടുത്തണമെന്നാണ് ജേക്കബ് തോമസ് ആവശ്യപ്പെട്ടതെന്നും സുപ്രീംകോടതി പറഞ്ഞു.
ഇതിനിടെ കോടതിയലക്ഷ്യ കേസില് ഡി.ജി.പി ജേക്കബ് തോമസ് കോടതിയില് ഹാജരാകുന്നതിന് ഹൈകോടതി സമയം നീട്ടി നല്കി. ജേക്കബ് തോമസ് അടുത്ത തിങ്കളാഴ്ച നേരിട്ട് ഹാജരാകണമെന്ന് ഹൈകോടതി ഉത്തരവിട്ടു.
നേരത്തെ, കേന്ദ്ര വിജിലന്സ് കമീഷന് അയച്ച പരാതിയിലാണ് ജേക്കബ് തോമസ് ഹൈകോടതി ജഡ്ജിമാര്ക്കെതിരെ പരാമര്ശം നടത്തിയത്. എന്നാല്, താന് ഹൈകോടതിക്കെതിരെ ആരോപണങ്ങള് ഉന്നയിച്ചിട്ടില്ലെന്നും ചില വസ്തുതകള് വിജിലന്സ് കമീഷനെ അറിയിക്കുകയാണ് ചെയ്തതെന്നും ആണ് ജേക്കബ് തോമസ് ഹരജിയില് ചൂണ്ടിക്കാട്ടിയത്.
തന്റെ പരാമര്ശങ്ങള് കോടതിയലക്ഷ്യമായി കാണാനാവില്ലെന്നും ഹൈകോടതി നടപടികള് റദ്ദാക്കണമെന്നും ഹരജിയില് ആവശ്യപ്പെടുന്നു.
