ന്യൂഡല്‍ഹി: ജര്‍മന്‍ വാഹനനിര്‍മ്മാണ കമ്പനിയായ ഫോക്സ്വാഗന് 500 കോടി രൂപ പിഴ ചുമത്തി ദേശീയ ഹരിത ട്രിബ്യൂണല്‍. മലിനീകരണത്തോത് കുറച്ചുകാട്ടാന്‍ കാറുകളില്‍ കൃത്രിമം കാണിച്ചെന്നു കണ്ടെത്തിയാണ് നടപടി. ഫോക്സ്വാഗന് രണ്ടു മാസത്തിനുള്ളില്‍ കേന്ദ്ര മലിനീകരണ നിയന്ത്രണ ബോര്‍ഡില്‍ പിഴയടക്കണമെന്ന് ജസ്റ്റിസ് ആദര്‍ശ് കുമാര്‍ ഗോയല്‍ അധ്യക്ഷനായ ബെഞ്ച് ഉത്തരവിട്ടു.
കഴിഞ്ഞ നവംബറിലാണ് കാറുകളില്‍ കൃത്രിമം നടത്തിയതായി കണ്ടെത്തിയത്. ഇതേത്തുടര്‍ന്നു 100 കോടി രൂപ കെട്ടിവെക്കാന്‍ കമ്പനിയോട് ഹരിത ട്രിബ്യൂണല്‍ ഉത്തരവിട്ടിരുന്നു. പിഴയടയ്ക്കാന്‍ നിര്‍ദേശിച്ചിട്ടും ഇതുവരെ അനുസരിക്കാത്ത കമ്പനിയെ കോടതി കടുത്ത ഭാഷയില്‍ വിമര്‍ശിച്ചു. പണമടച്ചില്ലെങ്കില്‍ ഫോക്സ്‌വാഗന്‍റെ ഇന്ത്യയിലെ ഡയറക്ടര്‍മാരെ ജയിലിടയ്ക്കാനും വസ്തുവകകള്‍ കണ്ടുകെട്ടാനുമായിരുന്നു നിര്‍ദേശം നല്‍കിയിരുന്നത്.
2015-ലാണ് പുക പരിശോധന പാസാകാന്‍ ഫോക്സ്വാഗന് ഡീസല്‍ കാറുകളില്‍ പ്രത്യേക സോഫ്റ്റ്‌വേര്‍ ഘടിപ്പിച്ച്‌ കൃത്രിമം നടത്തിയതായി തെളിഞ്ഞത്. ഇത്തരത്തിലുള്ള 3.23 ലക്ഷം കാറുകള്‍ ഇന്ത്യയില്‍ വിറ്റിട്ടുണ്ടെന്ന് ട്രിബ്യൂണല്‍ നിയോഗിച്ച വിദഗ്‌ധസമിതി കണ്ടെത്തിയിരുന്നു.
