മറയൂര്: യുവാവ് ജാതിമാറി വിവാഹം ചെയ്തിതനെ തുടര്ന്ന് മാതാപിതാക്കളും സഹോദരിയും ആത്മഹത്യ ചെയ്തു. മറയൂര് കീഴാന്തൂര് സ്വദേശി ടി.സി.മുരുകന്, ഭാര്യ മുത്തുലക്ഷ്മി, മകള് ഭാനുപ്രിയ എന്നിവരാണ് മരിച്ചത്.
തമിഴ്നാട് ഉദുമല്പേട്ട എസ്വി പുരം റെയില്വേ ട്രാക്കിനു സമീപമുള്ള പൊന്തക്കാട്ടില് വിഷം ഉള്ളില്ച്ചെന്നു മരിച്ചനിലയിലാണ് ഇവരെ കണ്ടെത്തിയത്. ഇവരുടെ മകന് പാണ്ടിരാജ് തമിഴ്നാട്ടിലെ മറ്റൊരു സമുദായക്കാരിയായ യുവതിയെ കഴിഞ്ഞ ശനിയാഴ്ച വിവാഹം ചെയ്തിരുന്നു. ഇതര സമുദായത്തില്പ്പെട്ടവരെ വിവാഹം ചെയ്താല് ഊരുവിലക്കുന്ന സമ്പ്രദായമുള്ള പ്രദേശമാണ് ഇവര് താമസിക്കുന്ന അഞ്ചുനാട് ഗ്രാമത്തിലെ കീഴാന്തൂര് പ്രദേശം.
മകന്റെ വിവാഹം കഴിഞ്ഞതിന്റെ പിറ്റേന്നു മാതാപിതാക്കള് ഉദുമല്പേട്ടയിലെത്തി അവിടെ ബിരുദ വിദ്യാര്ഥിനിയായ ഭാനുമതിയെ ഹോസ്റ്റലില്നിന്നു കൂട്ടിക്കൊണ്ടുപോയതായി പൊലീസ് പറയുന്നു. തുടര്ന്ന് ഉദുമല്പേട്ടയില് അന്വേഷിച്ചപ്പോള് മുരുകന്റെ മൊബൈല് ഫോണ് പഴനിക്കു സമീപമുള്ള ടവര് ലൊക്കേഷനില് സ്വിച്ച്ഓഫ് ചെയ്യപ്പെട്ടതായി കണ്ടെത്തി. തുടര്ന്ന് ഇന്നലെ രാവിലെ മൃതദേഹങ്ങള് കണ്ടെത്തി.
രണ്ടുവര്ഷം മുന്പ് ഉദുമല്പേട്ടയിലെ കോളജില് എംകോമിനു പഠിക്കുന്നതിനിടയിലാണു പാണ്ടിരാജ് തമിഴ്നാട് മഠത്തുകുളം സ്വദേശിനിയുമായി പ്രണയത്തിലായത്. പാണ്ടിരാജിനു കൊച്ചിയില് ജോലി കിട്ടിയപ്പോള് ഇരുവരും വിവാഹിതരാവുകയായിരുന്നു. മൃതദേഹങ്ങള് പോസ്റ്റ്മോര്ട്ടത്തിനു ശേഷം ഇന്ന് ഉദുമല്പേട്ടയിലെ വൈദ്യുതശ്മശാനത്തില് സംസ്കരിക്കും.
