തിരുവനന്തപുരം: വ്യാജ പേരില് കോവിഡ് പരിശോധന നടത്തിയെന്ന പരാതിയില് കെഎസ്യു സംസ്ഥാന പ്രസിഡന്റ് കെ.എം. അഭിജിത്തിനെതിരെ കേസെടുത്തു. ആള്മാറാട്ടം, പകര്ച്ചാവ്യാധി നിയന്ത്രണനിയമം എന്നിവ ചുമത്തിയാണ് കേസെടുത്തത്. പോത്തന്കോട് പഞ്ചായത്ത് പ്രസിഡന്റ് വേണുഗോപാലന് നായരുടെ പരാതിയിലാണ് കേസ്.
കെ.എം. അഭി എന്ന പേരായിരുന്നു അഭിജിത്ത് പരിശോധന സമയത്ത് നല്കിയിരുന്നത്. പോത്തന്കോട് പഞ്ചായത്തിലെ തച്ചംപള്ളി പോലുള്ള വാര്ഡില് വന്ന് ജില്ലക്കാരനല്ലാത്ത അഭിജിത്ത് കോവിഡ് പരിശോധന നടത്തിയെന്നത് ദുരൂഹമാണെന്ന് പഞ്ചായത്ത് പ്രസിഡന്റ് ആരോപിച്ചു. അഭിജിത്തിന്റെ കോവിഡ് പരിശോധനാ രജിസ്റ്റര് പുറത്തുവന്നിട്ടുണ്ട്. രജിസ്റ്ററില് സ്വന്തം വിലാസവും ഫോണ് നമ്ബറും അഭിജിത്ത് നല്കിയിരുന്നില്ല. രോഗം സ്ഥിരീകരിച്ച ശേഷവും സ്വന്തം നമ്ബര് നല്കിയില്ല. രോഗിയുടെ നമ്ബര് ഉപയോഗിച്ചാണ് സമ്ബര്ക്ക പട്ടിക തയാറാക്കുന്നത്.
കോവിഡ് പോസിറ്റീവായതിനാല് കഴിഞ്ഞ ആറ് ദിവസമായി സെല്ഫ് താന് ക്വാറന്റൈനിലാണെന്നും സഹപ്രവര്ത്തകന് ബാഹുല് കൃഷ്ണയാണ് പരിശോധനക്ക് പേര് നല്കിയതെന്നും അഭിജിത്തിന്റെ വിശദീകരണം. താന് മുങ്ങിയിട്ടില്ലെന്നും സംഭവിച്ചത് ക്ലെറിക്കല് തെറ്റാകാമെന്നും ഫേസ്ബുക്ക് പോസ്റ്റില് പറയുന്നു.