മാനന്തവാടി: നാടിനെ ഞെട്ടിച്ച് ദൃശ്യം സിനിമയെ അനുസ്മരിപ്പിക്കുന്ന കൊലപാതകവും തെളിവ് നശിപ്പിക്കലും. നിര്മാണത്തിലിരിക്കുന്ന വീട്ടില് മനുഷ്യശരീരം കുഴിച്ചു മൂടിയ നിലയില് കണ്ടെത്തി. എടവക പൈങ്ങാട്ടിരി നല്ലൂര്നാട് വില്ലേജ് ഓഫീസിന് എതിര്വശത്തെ നിര്മാണത്തിലിരിക്കുന്ന വീട്ടിനുള്ളിലാണ് ചാക്കില് പൊതിഞ്ഞ നിലയില് മണ്ണിനടിയില് കുഴിച്ചിട്ട മൃതദേഹം കണ്ടെത്തിയത്.
കൊല്ലപ്പെട്ടയാള് ആരാണെന്ന് വ്യക്തമായിട്ടില്ല. ദുര്ഗന്ധം വമിക്കുന്ന മൃതശശീരത്തിന് ഏകദേശം ഒരു മാസത്തെ പഴക്കമുണ്ടെന്നാണ് പോലീസിന്റെ നിഗമനം. ഒരു മാസം മുമ്പ് ഈ മുറിയിലെ മണ്ണ് ഇളകിയ നിലയില് കണ്ടിരുന്നെങ്കിലും തൊഴിലാളികള് അത് കാര്യമാക്കിയില്ല.
ബുധനാഴ്ച വീടുപണിക്കെത്തിയ ഒരു തൊഴിലാളി തറ നിരപ്പില് നിന്ന് മണ്ണ് താഴ്ന്ന നിലയില് കണ്ടതിനെ തുടര്ന്ന് കരാറുകാരനെ അറിയിക്കുകയും തുടര്ന്ന് മണ്ണ് മാറ്റി നോക്കുകയുമായിരുന്നു. ചാക്കില് കെട്ടി മണ്ണിനടിയില് താഴ്ത്തിയ മൃതദേഹത്തിനു മുകളില് ചെങ്കല്ല് കയറ്റി വെച്ചിട്ടുണ്ടായിരുന്നു. തുടര്ന്ന് മാനന്തവാടി പോലീസ് സ്ഥലത്തെത്തി പരിശോധന നടത്തുകയും തൊഴിലാളികളില് നിന്ന് മൊഴി ശേഖരിക്കുകയും ചെയ്തു.
മൃതദേഹം പുരുഷന്റെതാണെന്നാണ് സംശയിക്കുന്നത്. കൊലപാതകത്തില് ഒന്നില് കൂടുതല് പേര്ക്ക് പങ്കുള്ളതായാണ് പൊലീസിന്റെ വിലയിരുത്തല്. മറ്റെവിടെനിന്നോ കൃത്യം നടത്തിയതിനുശേഷം ഇവിടെ കൊണ്ടുവന്ന് കുഴിച്ചിട്ടതായിരിക്കാമെന്നാണ് കരുതുന്നത്. വിദഗ്ധമായി തെളിവു നശിപ്പിച്ച് പോലീസിനെ കബളിപ്പിക്കാനുള്ള ശ്രമമാണ് നിര്മാണത്തിലിരിക്കുന്ന വീട്ടില് മൃതദേഹം കുഴിച്ചു മൂടിയതിലൂടെ കൃത്യം നടത്തിയവര് ചെയ്തതെന്നു കരുതുന്നു.