കൊച്ചി: കൊച്ചിയില് യുവനടിയെ ആക്രമിച്ച കേസില് ദൃശ്യങ്ങള് ദിലീപിന് നല്കാനാകില്ലെന്ന് പ്രോസിക്യൂഷന് കോടതിയില് വ്യക്തമാക്കി.കേസില് കുറ്റപത്രത്തോടൊപ്പം കോടതിയില് സമര്പ്പിച്ച അനുബന്ധ രേഖകളും വീഡിയോ ദൃശ്യങ്ങളുടെ പകര്പ്പും ആവശ്യപ്പെട്ട് ദിലീപ് നല്കിയ ഹര്ജി പരിഗണിക്കവെയാണ് പ്രോസിക്യൂഷന് ഇക്കാര്യം കോടതിയെ അറിയിച്ചത്.
ഇരയുടെ സ്വകാര്യതയെ ബാധിക്കുന്നതിനാല് പെന്ഡ്രൈവിലെ ദൃശ്യങ്ങള് നല്കാനാവില്ലെന്നും പ്രോസിക്യൂഷന് അങ്കമാലി മജിസ്ട്രേറ്റ് കോടതിയെ അറിയിച്ചു.
കേസ് വ്യാഴാഴ്ച വീണ്ടും പരിഗണിക്കും. അതേസമയം ദൃശ്യങ്ങളിലെ ചില സംഭാഷണ ശകലങ്ങള് അടര്ത്തിമാറ്റി നടിയെ വീണ്ടും അപമാനിക്കാനുള്ള ശ്രമമാണ് ദിലീപ് നടത്തുന്നതെന്ന് അന്വേഷണ സംഘം കോടതിയെ അറിയിച്ചു.
കേസില് ദിലീപ് കുറ്റപത്രവും അനുബന്ധ രേഖകളും കൈപ്പറ്റിയിരുന്നു. അതേസമയം നടിയെ ആക്രമിച്ച ദൃശ്യങ്ങളുടെ പകര്പ്പ് നല്കിയിരുന്നില്ല. തുടര്ന്ന് ദിലീപ് അങ്കമാലി മജിസ്ട്രേറ്റ് കോടതിയെ സമീപിക്കുകയും ഇതിന്റെ അടിസ്ഥാനത്തില് ദിലീപിന്റെ സാന്നിധ്യത്തില് അവ പരിശോധിക്കാന് അഭിഭാഷകര്ക്ക് അനുമതി നല്കുകയും ചെയ്തിരുന്നു.
