കോഴിക്കോട്: മദ്യലഹരിയില്‍ ബൈക്കോടിച്ച്‌ വരുന്നത് തടഞ്ഞപ്പോള്‍ പൊലീസിന് മുന്നില്‍ ബ്ലേഡ് കൊണ്ട് കഴുത്ത് മുറിച്ച്‌ യുവാവ്. താമരശ്ശേരി ചുങ്കം ജംഗ്ഷന് സമീപം ഇന്നലെ വൈകിട്ട് അഞ്ചരയോടെയാണ് സംഭവം. പുതുപ്പാടി നെരൂക്കും ചാലില്‍ പുത്തലത്ത് താമസക്കാരനായ അബ്‍ദുള്‍ സലാമാണ് ആത്മഹത്യശ്രമം നടത്തിയത്. സ്വയം കഴുത്ത് മുറിച്ച്‌ പരിക്കേല്‍പ്പിച്ച ഇയാളെ ട്രാഫിക് പൊലീസ് ആശുപത്രിയില്‍ എത്തിക്കുകയായിരുന്നു.
മദ്യലഹരിയില്‍ അപകടകരമായ വിധത്തില്‍ ബൈക്കോടിച്ച്‌ വരുന്നതായി വിവരം ലഭിച്ചതിനെ തുടര്‍ന്ന് പൊലീസ് ചുങ്കം ജംഗ്ഷന് സമീപം ബൈക്കിന് കൈ കാണിക്കുകയായിരുന്നു. ഇയാള്‍ മദ്യപിച്ച്‌ വാഹനം ഓടിക്കാന്‍ കഴിയാത്ത നിലയിലായിരുന്നു. ഈ നിലയില്‍ ബൈക്കോടിച്ച്‌ പോകാന്‍ ആകില്ലെന്നും ബന്ധുക്കളെ ആരെയെങ്കിലും വിളിച്ചു വരുത്തണമെന്നും പൊലീസ് ആവശ്യപ്പെട്ടു.
ഇതോടെ തൊട്ടടുത്ത കടയിയിലേക്ക് പോയി ബ്ലേഡുമായി തിരിച്ച്‌ വന്ന് യുവാവ് കഴുത്തില്‍ മുറിവേല്‍പ്പിക്കുകയായിരുന്നു എന്ന് പൊലീസ് പറഞ്ഞു. മുറിവേല്‍പ്പിക്കാന്‍ കാരണമന്വേഷിച്ചപ്പോള്‍ കുടുംബ പ്രശ്നമെന്നാണ് ലഭിച്ച മറുപടി. തുടര്‍ന്ന് ഇയാളെ ആശുപത്രിയില്‍ എത്തിക്കുകയായിരുന്നു.
