കൊച്ചി: നടിയെ ആക്രമിച്ച കേസിന്റെ വിചാരണ നടപടികള് എറണാകുളം സിബിഐ കോടതിയില് ഇന്ന് തുടങ്ങും. ഹൈക്കോടതി നിര്ദ്ദേശ പ്രകാരമാണ് എറണാകുളം പ്രിന്സിപ്പല് സെഷന്സ് കോടതിയില് നിന്ന് കേസ് സിബിഐ കോടതിയിലേക്ക് മാറ്റിയത്. വിചാരണയ്ക്കായി വനിത ജഡ്ജി വേണമെന്നുള്ള ആക്രമിക്കപ്പെട്ട നടിയുടെ ആവശ്യ പ്രകാരമായിരുന്നു ഹൈക്കോടതി നടപടി.
കേസിലെ മുഴുവന് പ്രതികളോടും ഇന്നത്തെ വിചാരണയില് ഹാജരാകാന് സിബിഐ കോടതി ആവശ്യപ്പെട്ടിട്ടുണ്ട്. കേസില് ഒന്നാം പ്രതിയായ സുനില്കുമാര് ഹാജരാകുമെങ്കിലും നടന് ദീലീപ് ഹാജരായേക്കില്ല. ആറ് മാസത്തിനകം വിചാരണ പൂര്ത്തിയാക്കമെന്നാണ് ഹൈക്കോടതി വിചാരണ കോടതിക്ക് നല്കിയ നിര്ദ്ദേശം.
നടിയെ ആക്രമിച്ച കേസില് വിചാരണ വൈകിപ്പിക്കാന് പ്രതിഭാഗം ശ്രമിക്കുകയാണെന്ന് ഹൈക്കോടതി പറഞ്ഞിരുന്നു. കേസിലെ വിചാരണ നടപടികള് ആറ് മാസത്തിനകം പൂര്ത്തിയാക്കണമെന്ന ഉത്തരവ് പിന്വലിക്കണമെന്ന ആവശ്യവുമായി രണ്ടാം പ്രതി മാര്ട്ടിന് കോടതിയെ സമീപിച്ചപ്പോഴാണ് ഹൈക്കോടതിയുടെ നിരീക്ഷണം.
ചാക്കിലെ പൂച്ച പുറത്തുചാടിയിരിക്കുകയാണെന്നാണ് ദിലീപിനെക്കുറിച്ച് കോടതി പറഞ്ഞത്. വിചാരണ നടപടികള് ആറ് മാസത്തിനകം പൂര്ത്തിയാക്കണമെന്ന ഉത്തരവ് പിന്വലിക്കണമെന്ന പ്രതിയുടെ ആവശ്യം കോടതി തള്ളുകയും ചെയ്തു. പ്രതിയുടെ ആവശ്യം സര്ക്കാര് ശക്തമായി എതിര്ത്തിരുന്നു. നടിയെ ആക്രമിച്ച കേസില് വനിതാ ജഡ്ജി വിചാരണ നടത്തണമെന്ന ആവശ്യം ഹൈക്കോടതി അംഗീകരിച്ചിരുന്നു.