കൊച്ചി: ഉബര് ടാക്സി ഡ്രൈവറെ പട്ടാപ്പകല് നഗരമധ്യത്തില് ക്രൂരമായി മര്ദിച്ച മൂന്ന് യുവതികള് പോലീസ് പിടിയില്. കണ്ണൂര് സ്വദേശിനികളായ എയ്ഞ്ചല് ബേബി ക്ലാര സിബിന്, പത്തനംതിട്ടയിലെ ഷീജ എന്നിവരെയാണ് മരട് പൊലീസ് അറസ്റ്റ് ചെയ്തത്.
ബുധനാഴ്ച രാവിലെയാണ് സംഭവം നടന്നത്. കരിങ്കല്ല് കൊണ്ടുള്ള അടിയില് തലക്ക് പരിക്കേറ്റ ടാക്സി ഡ്രൈവര് കുമ്പളം സ്വദേശി ഷഫീഖിനെ എറണാകുളം ജനറല് ആശുപത്രിയില് പ്രവേശിപ്പിച്ചിരിക്കുകയാണ്.
യുവതികള് വിളിച്ച ടാക്സിയില് മറ്റൊരാള് കയറുന്നത് അനുവദിക്കില്ലെന്നും ഇറക്കിവിടണമെന്നും ആവശ്യപ്പെട്ടാണ് പ്രശ്നം തുടങ്ങിയത്. എന്നാല് മുന്നേ ബുക്ക് ചെയ്തതാണെന്നും ഇറക്കിവിടാന് ആവില്ലെന്നും ഷഫീഖ് പറഞ്ഞു. തര്ക്കം കണ്ട് ട്രാഫിക് പോലീസും നാട്ടുകാരും ചുറ്റും കൂടി. തുടര്ന്ന് യുവതികള് ക്രൂരമായി മര്ദിക്കുകയായിരുന്നു.
സ്റ്റേഷനിലെത്തിച്ച യുവതികളെ മൊഴിയെടുത്തശേഷം വൈദ്യപരിശോധനക്ക് വിധേയരാക്കി. തുടര്ന്ന് ജാമ്യത്തില് വിട്ടു.