ചെന്നൈ: ഓഖി ചുഴലിക്കാറ്റ് നാശം വിതച്ച മേഖലകളുടെ പുനരുദ്ധാരണത്തിന് സാമ്പത്തിക സഹായം ആവശ്യപ്പെട്ട് തമിഴ്നാട് സര്ക്കാര് നരേന്ദ്ര മോദിക്ക് കത്തയച്ചു. ദേശീയ ദുരന്തമായി പ്രഖ്യാപിച്ച് അടിസ്ഥാന സൗകര്യങ്ങള് മെച്ചപ്പെടുത്താന് അടിയന്തര സാമ്പത്തിക സഹായം ചെയ്യണമെന്നാണ് തമിഴ്നാട് സര്ക്കാര് ആവശ്യപ്പെട്ടിരിക്കുന്നത്.
ചുഴലിക്കാറ്റില് സംസ്ഥാനത്ത് ഏറ്റവും കൂടുതല് നാശനഷ്ടമുണ്ടായത് കന്യാകുമാരി ജില്ലയിലാണെന്ന് തമിഴ്നാട് മുഖ്യമന്ത്രി എടപ്പാടി പളനിസ്വാമി അയച്ച കത്തില് പറയുന്നു. കേരള, കര്ണാടക, മഹാരാഷ്ട്ര, ഗുജറാത്ത് എന്നീ സംസ്ഥാനങ്ങള് തമിഴ്നാട്ടില് നിന്നുള്ള ധാരാളം മത്സ്യതൊഴിലാളികള്ക്ക് താമസവും മറ്റ് സൗകര്യങ്ങളും നല്കുന്നുണ്ട്. ഇതിനുള്ള നന്ദിയും അദ്ദേഹം അറിയിച്ചു.
തമിഴ്നാട്ടില് നിന്നുള്ള നിരവധി മത്സ്യതൊഴിലാളികളെ കാണാതായിട്ടുണ്ടെന്നും, ഇവരെ കണ്ടെത്താന് നാവികസേന നടത്തുന്ന തിരച്ചില് കന്യാകുമാരി മുതല് ഗുജറാത്ത്, മാലിദ്വീപ് വരെയുള്ള കടല് മേഖലയില് ഊര്ജിതമാക്കണമെന്നും സര്ക്കാര് കത്തില് സൂചിപ്പിക്കുന്നു. സംസ്ഥാനത്തുള്ള നഷ്ടത്തിന്റെ കണക്കുകള് വിശദമായി കേന്ദ്രത്തിന് സമര്പ്പിക്കുമെന്നും കത്തിലുണ്ട്.
