ന്യൂഡല്ഹി: ശബരിമല ദര്ശനം നടത്തിയ ബിന്ദുവിനും കനകദുര്ഗയ്ക്കും പൊലീസ് സംരക്ഷണം നല്കണമെന്ന് സുപ്രീംകോടതിയുടെ നിര്ദേശം. ഇവര്ക്ക് ഇപ്പോള് തന്നെ സംരക്ഷണം നല്കുന്നുണ്ടെന്ന് സംസ്ഥാന സര്ക്കാര് അറിയിച്ചു. അപ്പോള് ഇത് തുടര്ന്നാല് മതിയെന്ന് കോടതി പറഞ്ഞു.
ഇവരുടെ ജീവനും സ്വത്തിനും സംരക്ഷണം നല്കേണ്ടത് സംസ്ഥാന സര്ക്കാരിന്റെ ഉത്തരവാദിത്വമാണ്. ഇക്കാര്യം ഓരോ പൗരനും ഭരണഘടന ഉറപ്പ് നല്കുന്നതുമാണ്. ഇക്കാര്യം സംസ്ഥാന സര്ക്കാര് ഉറപ്പാക്കണമെന്നും കോടതി നിര്ദ്ദേശിച്ചു.
ശബരിമല കയറിയ ശേഷം നിരന്തരം സംഘപരിവാര് ഭീഷണി നിലനില്ക്കുന്ന സാഹചര്യത്തിലാണ് ബിന്ദുവും കനകദുര്ഗയും പൂര്ണ്ണ സുരക്ഷ ആവശ്യപ്പെട്ട് സുപ്രീംകോടതിയെ സമീപിച്ചത്. ചീഫ് ജസ്റ്റിസ് രഞ്ജന് ഗോഗോയ് ജസ്റ്റിസ് നാഗേശ്വര് റാവു, ജസ്റ്റിസ് ദിനേശ് മഹേശ്വരി എന്നിവര് അടങ്ങിയ ബെഞ്ച് ആണ് ഹര്ജി പരിഗണിച്ചത്.
